Birlesý-Eńbek orta mektebi óńirdegi demografııalyq ósimge baılanysty oryn tapshylyǵyn joıý maqsatynda jańadan boı kótergen bilim nysany. Jańa bilim oshaǵynda balalardy sapaly bilimmen qamtý úshin barlyq jaǵdaı jasalǵan. Mektepte 18 oqý qabıneti, sport zaly, májilis zaly, ashana, 2 kompıýterlik synyp, robottehnıka jáne jańa modıfıkasııalyq kabınetter bar. Sonymen qatar bıyl mektepte barlyǵy 250 oqýshy 2 aýysymda oqıtyn bolady. Atalǵan mektepte 39 pedagog qyzmet etse, onyń 12,5 paıyzy jas mamandar.
Bilim kúni qarsańynda Baızaq aýdanynyń Aqsholaq aýylynda da 120 oryndyq jańa mektep paıdalanýǵa berildi. Saltanatty jıyn «О́ner» mektebi ónerpazdarynyń myń buralǵan bıimen ashyldy. Atalǵan bilim oshaǵynyń ashylý saltanatyna oblys ákiminiń orynbasary Sulýshash Qurmanbekova qatysyp, barlyq ata-analar men muǵalimderdi, oqýshylardy jańa oqý jylymen quttyqtady. S.Qurmanbekova óz sózinde sońǵy bes jylda osy bilim mekemesiniń oqýshylary úsh aýysymda oqyp kelgenin, bıyl bul máseleniń sheshilgenin, óńirde úsh jyldan beri bilim berý salasyna bólinip jatqan qarjynyń kólemi úsh ese artyp, 130 mlrd teńgeni quraǵanyn, nátıjesinde oblys boıynsha bes mektep jańadan paıdalanýǵa berilip otyrǵanyn jetkizdi. Sondaı-aq mektep ujymyna oblys ákimi A.Myrzahmetovtiń arnaıy syılyǵyn tabys etti. Budan keıin aýyl aqsaqaly, eńbek ardageri Qalman Baqtybaev sóz alyp, bilim oshaǵynyń boı kóterýine atsalysqan barsha azamattarǵa alǵysyn bildirip, mektep tabaldyryǵyn attaǵan baldyrǵandarǵa sáttilik tiledi. Ashylyp otyrǵan jańa nysannyń lentasyn S.Qurmanbekova men Q.Baqtybaev qıdy. Jańa bilim ordasy zamanaýı qural-jabdyqtarmen qamtamasyz etilgen. Ǵımaratta sapaly bilim alýǵa qolaıly zamanaýı kabınetter men zerthanalar, mýltımedıalyq kabınetter bar.
Bilim kúniniń qarsańynda Merki aýdany, Qazaq-Dıhan aýylynyń turǵyndary da úlken qýanyshqa keneldi. Atalǵan eldi mekende 120 oryndyq jańa mektep paıdalanýǵa berildi. Eń bastysy, aýyl balalary bastaýyshtan soń óz bilimderin jalǵastyrý úshin kórshi aýylǵa qatynamaıtyn boldy. Endi 120 oryndyq mektepte 100-den asa oqýshy bilim nárimen sýsyndasa, munda 27 muǵalim eńbek etedi. Bilim nysanynyń ashylý saltanatyna oblys ákiminiń orynbasary Erkebulan Daýylbaev qatysyp, mektep ujymy men oqýshylardy quttyqtady. Sonymen qatar ol bıyl óńirde 15 mekteptiń qurylysy júrgizilip, oǵan 5 mıllıardtan astam qarjy jumsalyp otyrǵanyn, nátıjesinde apatty mektepter máselesi sheshimin tapqanyn jetkizdi. 2018 jyly qurylysy bastalǵan nysannyń merdigeri – «Andas Grýpp» jaýapkershiligi shekteýli seriktestigi. Ǵımarat barlyq talaptarǵa saı jabdyqtalǵan.
Bilim kúni qarsańynda Shý aýdanynda da jańa mektep paıdalanýǵa berildi. Aýdanǵa qarasty «Toǵaı» shaǵyn aýdanynan 300 oryndyq jańa bilim oshaǵy boı kóterdi. Osy ýaqytqa deıin «Toǵaı» shaǵyn aýdanynyń turǵyndaryna mekteptiń azdyǵy qıyndyq týdyryp kelgen edi. Bıyl bul másele de óz sheshimin taýyp otyr. Jobalyq quny 1,3 mlrd teńgeni quraǵan nysanǵa Turar Rysqulov mektebi kóshirildi. Bilim uıasynyń ashylýyna oblys ákiminiń orynbasary Nurjan Kalenderov qatysyp, muǵalimder men ata-analardy jáne oqýshylardy bilim kúnimen quttyqtady. Jańa mektepte barlyq jaǵdaı jasalǵan. Oqý kabınetteri de qajetti qural-jabdyqtarmen qamtamasyz etilgen. Zeınetker ustaz Seıitqasym Beketaıuly jastarǵa bilimdi adam ǵana tulǵa bolyp qalyptasa alatynyn, sondyqtan da barlyq talapqa saı mektepte tek jaqsy oqý kerektigin jetkizdi. Al mektep qurylysyn júrgizgen merdiger kompanııa ókili Dana Áshimbekqyzy sımvolıkalyq kiltti mektep dırektory Aıgúl Serikqyzyna tapsyryp, kompanııa atynan arnaıy syılyq tabystady.
Sonymen qatar T.Rysqulov aýdany, Jalpaqsaz aýylyndaǵy 48 oryndyq bastaýysh mektep el ıgiligine berildi. Saltanatty sharaǵa aýdan ákimi Erbolat Sadyrqulov pen oblystyq Bilim basqarmasynyń bas mamany Janna Qalybaeva qatysty. Aýyl mektebi barlyq talapqa saı jaraqtandyrylǵan.
Jalpy, óńirde 2019-2020 oqý jylynda 5 mektep paıdalanýǵa berildi. Onyń 1-eýi úsh aýysymdy, 1-eýi apatty jáne 3-eýi oryn tapshylyǵy bar mekteptiń máselesin sheshti. Oblys ákimdiginiń málimetinshe, jyl sońyna deıin taǵy 4 nysan paıdalanýǵa beriletin bolady. Bıyl oblystyń bilim júıesin qarjylandyrýǵa 130 mlrd teńge bólingen. Bul ótken jylmen salystyrǵanda 22,2 mlrd teńgege artyq. Onyń 5,1 mlrd teńgesi bilim berý nysandarynyń qurylysy men kúrdeli jóndeýge qaralyp, búginde 16 bilim nysanynyń qurylysy júrgizilýde. Sonymen qatar, aımaq boıynsha 28 myń baldyrǵan mektep tabaldyryǵyn attap otyr. Jambyldyqtar jańa oqý jylyn jańa leppen bastady. О́ńirde jyl saıyn jańa mektep pen balabaqshalar qurylysy qarqyn alyp keledi. Memleket tarapynan jasalyp otyrǵan mundaı qoldaý bolashaqta elimizde bilimdi azamattardy qalyptastyrýǵa óziniń septigin tıgizetini anyq.
Jambyl oblysy
