«7-20-25» jáne «Baqytty otbasy» - bir-birine uqsamaıtyn, sharttary bir-birin qaıtalamaıtyn bólek ıpotekalyq baǵdarlamalar bolyp tabylady. Olardyń tutynýshy sanattary bólek. «7-20-25» baǵdarlamasy atynda úıi joq, resmı tabysy bar, halyqtyń ekonomıkalyq belsendi sanatyna jatatyn azamattarǵa arnalǵan. Al «Baqytty otbasy» baǵdarlamasy quramyna kópbalaly analar, tolyq emes otbasylar, múmkindigi shekteýli bala asyrap otyrǵan otbasylar kiretin halyqtyń áleýmettik qorǵalatyn sanatyna arnalǵan. «7-20-25» baǵdarlamasy naryqtan ózdiginshe qarjy tartyp, bankterdiń ıpotekalyq kredıtterin satyp alady, al «Baqytty otbasy» baǵdarlamasy tikeleı memlekettik bıýdjet tarapynan qarjylandyrylady», delingen habarlamada.
Halyqtyń ekonomıkalyq belsendi bóligine arnalǵan «7-20-25» baǵdarlamasy 7% jyldyq ústememen, 20%-dan bastalatyn alǵashqy jarna, 25 jylǵa deıingi merzim sharttarymen ıpotekalyq nesıe alýǵa múmkindik beredi.
«7-20-25» baǵdarlamasy Elbasy N.Á.Nazarbaevtyń «Prezıdenttiń bes áleýmettik bastamasy» atty halyqqa úndeýi aıasynda «Árbir otbasy úshin baspana alýdyń jańa múmkindikterin berý» birinshi bastamasyn iske asyrý maqsatynda ázirlendi.
Baǵdarlama buǵan deıin naryqta bolǵan jyldyq ústemelerdi eki esege azaıtty, ıpotekalyq nesıe merzimin 25 jylǵa deıin sozdyrdy. Bul óz kezeginde azamattar úshin ıpotekanyń aı saıynǵy tólemderin arzandatyp, bir jyl ishinde 10 myńnan astam otbasynyń baspanaly bolýyna múmkindik berdi.
«Alaıda atalmysh baǵdarlama kópbalaly analar, tolyq emes otbasylar, múmkindigi shekteýli bala asyrap otyrǵan otbasylar kiretin halyqtyń áleýmettik qorǵalatyn sanatyna arnalmaǵan. Olar úshin úkimet tarapynan «Baqytty otbasy» baǵdarlamasy ázirlenip, jumys isteýde», delingen uıym habarlamasynda.
