Jaqynda talapty qyz óziniń jeke isin ashyp, bolashaq bıznesiniń irgetasyn qalady. Olga jeke kásipker retinde tirkelýdiń sonshalyqty qıynǵa túspegenin aıtady.
– Jasaǵan buıymdarymdy tanystaryma satamyn. Keıde «sarafan radıosy» arqyly meni taýyp alyp, zattar satyp alatyn oqıǵalar da bolyp turady, – deıdi Olga.
Olga Gontarıovany onyń kolledjdegi jetekshisi Dámeli Kenjebaeva oryndy maqtan etedi.
– Olga – óz isine úlken jaýapkershilikpen qaraıtyn stýdent. Tańdap alǵan kásibin jan-tánimen súıedi. Ol shynynda da ónerli qyz: sýret te salady, aǵashtan oıyp buıym da jasaıdy, bir sózben aıtqanda qolynan kelmeıtini joq. Bolashaqta ol bastaǵan istiń tabysty bolaryna kúmánim joq, – deıdi ustaz.
Oqýda ozat Olga qoǵamdyq jumystarǵa da belsendi túrde atsalysady. Ol «Adal dos» atty qoǵamdyq birlestiktiń ókili. Uıym ıesiz júrgen úı janýarlaryn qorǵaýmen aınalysady. Sonymen qatar Olga eriktiler jasaǵynyń da belsendi múshesi.
Jalpy Qaraǵandy tehnıka-qurylys kolledjinde stýdentterdi oqý orny qabyrǵasynda júrgeninde-aq bolashaq mamandyǵyna óndiristik tájirıbe negizinde baýlý isi durys jolǵa qoıylǵan. Mysaly, bul jerde bolashaq dızaınerler ózderiniń túrli jobalaryn ázirlep, olardy qurylysshy mamandyǵyna oqyp jatqan stýdentterge beredi. Al olar bolsa, qajetti materıaldardy tańdap alyp, dızaınerlerdiń jobasyn iske asyrady. Iаǵnı, kolledjde zerthanalary ózara tyǵyz qarym-qatynasta áreket etetin quzyret ortalyǵy jemisti jumys isteıdi. Aıta ketetin bir jaıt, atalǵan kolledj byltyrdan beri respýblıkalyq bıýdjetten qarjylandyrylatyn bilim mekemeleriniń qataryna qosylǵan.
QARAǴANDY
