Qazirgi tańda QHR-ynyń ekonomıkalyq áleýeti Ortalyq Azııa damýynyń mańyzdy faktoryna aınaldy. Qytaı aımaq elderiniń iri saýda seriktesi retinde ornyqty jáne Ortalyq Azııa ekonomıkasynyń mańyzdy salalaryna quıylǵan Qytaı ınvestısııasynyń kólemi jyl saıyn artyp keledi. Qazaqstan Respýblıkasy Prezıdenti janyndaǵy Qazaqstandyq strategııalyq zertteýler ınstıtýtynyń bas ǵylymı qyzmetkeri Vıacheslav Dodonov «Qazaqstan men Qytaıdyń BRI jobasyn iske asyrý kezindegi saýda jáne ınvestısııalyq salalaryndaǵy yntymaqtastyǵy» týraly aıtyp ótti. Qytaımen ekonomıkalyq yntymaqtastyqtyń joǵary qarqynyn saqtaı otyryp, Ortalyq Azııa elderiniń ınvestısııalyq táýekelderin qalaı tómendetýge bolady? Aımaq elderi úshin qytaı ınvestısııalaryna uzaqmerzimdi qaryz táýeldiligi máselesi qanshalyqty ózekti? Qytaımen ekonomıkalyq qatynas qurýda Ortalyq Azııa elderiniń kózqarastary men qadamdaryn biriktirýdiń bolashaǵy qandaı? Mundaı strategııanyń artyq-kemshin tustary qaısy?
Sarapshylardyń paıymdaýynsha, bul taqyryptar jeke-dara talqylanatyn máseleler.
Sebebi saýda-ekonomıkalyq qatym-qatynastyń qarqyndy damýymen qatar birqatar ekiudaı tendensııalar baıqalady. Atap aıtsaq, ekonomıkalyq qatynas qurylymynda teńgerimsizdik aıqyn seziledi. Ásirese, QHR-ynyń qarjy ınstıtýttary aldyndaǵy qaryz kóleminiń ósýi úlken alańdaýshylyq týǵyzady.
Ortalyq Azııa elderiniń qoǵamy bul úderisterdi ekiudaı qabyldaýda. Ortalyq Azııa elderinen at aryltyp kelgen sarapshylar dóńgelek ústel barysynda aspan asty elimen keńeıa túsken yntymaqtastyqqa baılanysty týýy múmkin syn-tegeýrinder men múmkindikter týraly óz pikirlerin ortaǵa saldy.
