Qostanaı qysta tońbaıdy

– Bilim berý, densaýlyq, áleýmettik sala jáne kóp qabatty úılerdiń barlyǵy jylytý maýsymyna saqadaı-saı. Osylardyń barlyǵynyń ázirligin pysyqtaý úshin qazir jylý júıesinde gı­dravlıkalyq kúzgi synaqtar júrgizip, tekserip jatyrmyz. Osyndaı jumys barysynda 32 qubyrdan aqaý tabyldy. Eń aýqymdy jumys «SSKО́B» aksıonerlik qoǵamynyń Rýd­nyı jylý-ener­getıkalyq orta­lyǵynda júrdi. Sońǵy úsh jylda jyl saıyn osy ortalyqtyń jón­deý jumystaryna 5 mlrd teńge jumsalady, – deıdi oblys ákiminiń orynbasary Ǵaýez Nur­muhambetov.

Bıýdjettik mekemeler men kásiporyndar úshin kómirdiń 90 paıyzy, al turǵyndar úshin qajetti otynnyń 80 paıyzy jetkizildi. Al kenshiler qalasy men óndiristi jylýmen, elektr energııasymen qamtamasyz etip otyrǵan Sokolov-Sarybaı ken óndirý birlestiginiń Rýdnyı jylý-elektr ortalyǵyna kómir jyl boıy tasylady. Oǵan jylyna 931 myń tonna kómir jetkiziledi. Qazir qys maýsymyna arnalǵan tıisti kómir qory jasaldy.

Qalany mazýt arqyly jylytyp otyrǵan Arqalyq qalasy úshin qys maýsymy óte qymbatqa túsedi. Sebebi mazýt qymbat, ol ýaqtyly jetkizilmese, 40 myń­nan asa halqy bar qalanyń jaǵ­daıy qaqaǵan aıaz ben tútegen boranda qıyn bolatyny belgili. Oblys ákimdiginiń habarlaýynsha bıylǵy qys­ta mazýt jetkilikti bolady. Ar­qalyq jylý energetıkalyq or­talyǵynda qazir 1,84 myń tonna byltyrdan artylǵan mazýt bar. Qajetti 21,1 myń tonna mazýt Energetıka mınıstrliginiń jasaǵan kestesine sáıkes munaı jáne munaı ónim­derimen qamtamasyz etetin oblys­tardan qazan aıynan keler jyldyń aqpanyna deıin tasylady. Qalany jylytýdy aldaǵy jyldary kómirge aýystyrý úshin júretin jumystardyń qujattary daıyndalýda. Ol úshin oblys bıýdjetinen 500 mıllıon teńge bólindi, jetpegeni jergilikti bıýd­jetten qaralady. Negizi Arqa­lyq jylý-energetıkalyq orta­lyǵyn mazýttan kómirge kóshirý birneshe jyldan beri aıtylyp keledi. Qazir jobanyń smetalyq qujattary daıyndalyp, komıssııalyq qaralýǵa jiberildi. Aldaǵy jyly ol iske asady degen boljam bar. Sonda Shubarkólden tasylatyn kómir Arqalyq jylý-energetıkalyq ortalyǵy úshin ári arzan jáne tıimdi bolady.

Jylý oblys qalalaryna aýa raıyna qaraı qazannyń basynan bastap satylap beriledi.

QOSTANAI