Endi sol jerge 400 jumys ornyn ashqan alyp «Dostyk mall» degen saýda, oıyn-saýyq kesheni qurylysyn aıaqtap, jýyrda saltanatty túrde ashyldy. Bul jobany jergilikti kásipker Muhtar Igibaev 5,5 mlrd teńge qarajat shyǵaryp, iske asyryp otyr. Qalanyń kórkin asyryp, turǵyndarǵa kóńildi kúı syılaǵan M.Igibaevtyń ózi uzaq jyldardan beri kásipkerlikpen aınalysyp keledi.
Tórt qabatty saýda, oıyn-saýyq ortalyǵynyń aýmaǵy 30 myń sharshy metrdi quraıdy. Astyńǵy qabattary túrli sýpermarketter bolǵanda joǵarǵy qabattarynda balalarǵa arnalǵan oıyn-saýyq alańy, kınoteatr, dámhanalar men meıramhanalar oryn alǵan. Barlyq turpaty Nur-Sultandaǵy «Han-Shatyrǵa» uqsaıtyn ǵımarat endi qyzyljarlyqtar ıgiligine aınalary sózsiz.
Ortalyqtyń ashylý saltanatyna qatysqan oblys ákimi Qumar Aqsaqalov Qyzyljarda buryn-sońdy bolmaǵan záýlim saýda jáne oıyn-saýyq ortalyǵy halyqqa qaltqysyz qyzmet etetinine senim bildirdi.
Ortalyqtyń syrtynda turǵyndarǵa yńǵaıly bolýy úshin 400 oryndyq avtoturaq ta uıymdastyrylypty. Esik aldynda demalyp otyratyn shaǵyn saıabaq ta boı kótergen.
Saýda orny birinshi kúni-aq túrli taýarlarǵa barynsha baı ekenin kórsetti. Oǵan kelýshiler kúni boıy aǵylyp, úzilmedi. Biraq atalmysh nysannyń ashylý saltanatynda óner kórsetken topty sharany uıymdastyrýshylardyń ózimizden shaqyrmaı, Reseıden aldyrǵany ǵana kóńilge qaıaý túsirgendeı boldy...
PETROPAVL
