Bul aýqymdy is-sharaǵa Ǵalym Baınazarovtyń týǵan jerdegi týystary, burynǵy qyzmettesteri, aýdan ákimdigi, «Nur Otan»partııasynyń aýdandyq fılıaly, jalpy jurtshylyq ókilderi qatysty. Eli úshin eńbek etken, úlken tulǵaǵa aınalǵan perzent týǵan jerdiń de maqtanyshy. Jumaqan Sádýaqasov aqsaqal – Ǵalym Baınazarovtyń qyzmettegi ustazy. Osyndaı shákirt tárbıelegen qartty aýyldastar da aldynan ótpeı syılaıdy.
– Torǵaı topyraǵy halqymyzdyń iri tulǵalaryn berdi. Ǵalym Baınazarov ta qazaqtyń irileriniń qataryn tolyqtyrǵan adam. Torǵaı halqy aýdandaǵy bank júıesinde qyzmet etken, ony damytýǵa qatysqan eki adamdy jaqsy biledi. Sonaý soǵys jyldary aýdanda bankti Nurǵalı Qarataev degen kisi basqardy, ol aldymen oblystyq bankke, odan respýblıkalyq bankke kóterilip, ony 1965 jylǵa deıin basqardy. Sodan keıingi Ǵalym boldy. Bank júıesin jetildirý, basqarý elimizdiń ekonomıkasyn kóterý degen sóz. Ǵalymnyń Táýelsiz elimizdiń bank júıesiniń irgetasyn qalaýǵa úlesi mol, – dedi Jumataı aqsaqal. Kesh barysynda qonaqtar men kórermender mereıtoı ıesi Ǵalym Baınazarovtyń beınebaılanys arqyly jerlesterine joldaǵan jyly lebizin tyńdady. Sonymen qatar telearnalarǵa bergen suhbattary da kórermen nazaryna usynyldy.
Keshke ataqty kompozıtor, Torǵaı týmasy Baqytjan Baıqadamovtyń jıeni Jupar Tatkenovanyń qatysýy «mýzeı túniniń» mazmunyn qalyńdata tústi. Keshte ol kompozıtorǵa arnalǵan kórmeniń lentasyn qıdy. Baqytjan Baıqadamov Torǵaı óńirinen shyqqan alǵashqy kásibı kompozıtor boldy. Qazaq hor óneriniń negizin qalaǵan jan. Onyń ánderi soǵystan keıingi jyldary keń taraldy. Torǵaı óńirinde onyń Bolat Hamzın, Qalıbek Derpsaldın, Baqytjan Sáýekenov, Tóken Eltebaev, Ámına Sarmanova, Aqtorta Ábilova sekildi izbasarlary bar, keıingi tolqyn da ósip keledi.
Jupar apaı atasynyń kórmesine qurqol kelmepti. Ol murajaı qoryna Baqytjan Baıqadamov pen Danabıke Qaraldına-Baıqadamovanyń portretterin, kompozıtordyń zaıyby general I.V.Panfılovtyń qyzy Valentına Ivanovna jeńgesiniń óz qolymen salǵan mınıatıýralaryn syıǵa tartty. Qonaqtar quttyqtaýlary men jyly lebizderi jáne aǵa urpaq ókilderiniń mazmundy áńgimelerinen keıin án men kúıge de kezek berildi. Kúzdiń keshinen bastalǵan «mýzeı túni» túngi saǵat 01.00-ge deıin jalǵasty.
– Kúndiz jumystan bosaǵan soń, keshke mýzeıge kelgen aýyldastar asyqpady. Túngi mýzeıde adamdar mazmundy áńgime tıegin tarqatyp, sharany ádemi keshke aınaldyryp jiberdi. Bul mádenı ómirimizdegi jaqsy dástúrge aınalady, – deıdi Torǵaıdaǵy mýzeıler kesheniniń dırektory Gúlbaný Sársekeeva.
Qostanaı oblysy,
Jangeldın aýdany
