Jumysqa qolaıly jaǵdaı jasap, qala tazalyǵyn odan ári jaqsartyp, qoldaý maqsatynda qosymsha 120 birlik tehnıka alynady. Arnaıy tehnıkalar «Astanaenergoservıs» AQ-yn taratýdan únemdelgen qarjy esebinen satyp alynady.
«Kásiporyn qurylǵan ýaqyttan bastap, sizder óte mańyzdy mindetti atqaryp, elordamyzdyń tazalyǵyn qamtamasyz etýde úlken úles qosyp kelesizder. Qystyń aıazy men jazdyń ystyǵyna, qar men jańbyrǵa qaramastan tańnyń atysynan kesh batqanǵa deıin qala jaılylyǵy úshin eńbek etip júrsizder. Sizderdiń osy eńbekterińiz ben osyndaı jumys qabiletterińizge qarap, bizdiń kóptegen turǵyndar, ásirese balalar úlgi alady dep oılaımyn. Aldymyz qys, jylý maýsymy. Jumys aýqymy ulǵaıady. Biz sizderdi qashan da qoldaımyz. Qysqy tazalyq jumystaryn júrgizýde jeńil bolý úshin bıylǵy jyly 120 birlik jańa tehnıka satyp alamyz. Bizdiń jumysshylarymyzdyń jumys jaǵdaılarynyń jaqsy bolǵanyn qalaımyz»,- dedi A. Kólginov.
Qala ákimi qalanyń ósip, oǵan qosa turǵyndardyń da talaby artyp otyrǵanyn aıtyp, avtoparkterdiń múmkindiginshe jańaryp otyratynyn atap ótti. A. Kólginov jumysshylarǵa atqaryp júrgen qıyn da kúrdeli jumystary úshin alǵys aıtyp, densaýlyq, otbasylyq amandyq-saýlyq tiledi.
