Densaýlyq saqtaý vıse-mınıstri Lázzat Aqtaevanyń túsindirýinshe, «Codex Alimentarius» standarttary tutynýshylardyń densaýlyǵyn qorǵaýǵa jáne azyq-túliktiń adal saýdasyn qamtamasyz etýdi kózdeıdi, halyqaralyq saýdany damytý úshin úılesimdilik deńgeıin arttyrýǵa kómektesedi jáne saýda daýlaryn sheshýde mańyzdy ról atqarady.
«Onda tamaq gıgıenasy, taǵamdyq qospalar, veterınarııalyq dárilik zattyń pestısıd qaldyqtary, lastaýshy zattar, zattańbalaý, taldaý jáne synamalardy irikteý ádisteri, Eýropa elderi men basqa da elder úshin tamaqtaný tizbeginiń barlyq kezeńderinde azyq-túlik ımporty men eksportyn sertıfıkattaýdy baqylaý týraly erejeler bar» dedi Densaýlyq saqtaý vıse-mınıstri Lázzat Aqtaeva.
Qazaqstannyń eksporttyq saıasatynda belsendilik basym ekeni belgili. Álem halyqaralyq standarttarmen moıyndalǵan azyq-túlik túrlerine ǵana basymdyq beredi. «Codex Alimentarius» standarttary Dúnıejúzilik saýda uıymy sheńberinde moıyndalǵan.
Densaýlyq saqtaý mınıstrligi Taýarlar men qyzmetterdiń sapasy men qaýipsizdigin baqylaý komıtetiniń tóraıymy Lıýdmıla Bıýrabekovanyń aıtýynsha, sáıkessizdikter men jalǵan ónimderdiń kópshiligi sút jáne maı ónimderinde kezdesedi.
«Tabıǵı ónimder dep kórsetedi de quramynda ósimdik maıy bar taǵamdardy sata beredi» deıdi Lıýdmıla Bıýrabekova.
«Alımentarıýs kodeksi» komıssııasynyń Eýropa boıynsha úılestirý komıtetiniń 31-sessııasy 4 qazanǵa deıin jalǵasady.
ALMATY
