Igiligi mol sharanyń qatysýshylary forsaıt-alańda mesenattar men ınvestorlardyń saraptamasy men qoldaýyn qajet etetin ózekti «Start-up» jobalardyń tusaýyn kesip, jumystarymen tanystyrdy. Dostyq úıiniń Atrıým zalynda qolónershilerdiń, jas startapshylardyń ónimder kórmesi uıymdastyryldy.
Sharaǵa «Atameken» kásipkerler palatasynyń ókili Ásel Atabaeva, «Natige» jáne «220 VOLT» kompanııasynyń quryltaıshysy Erlan Áshim, Azamattyq bastamalar ortalyǵynyń basshysy Natalıa Krasnıkova, «Rýhanı jańǵyrý» keńsesiniń menedjeri, «Pixel»jobalaý stýdııasynyń jetekshisi Abaı Otarbaev qatysyp, bıznesti ashý jáne ony damytý tájirıbesimen bólisti, kásipkerlik salasyndaǵy memlekettik qoldaý sharalary jáne jastar saıasaty týraly aıtyp berdi. Sondaı-aq jalyndy jastardyń jańa jobasyna qoldaý kórsetti. Is-shara «Jańǵyrý joly» RJQ aımaqtyq shtabynyń ókilderi, etnomádenı birlestikter, stýdentter, oqýshylar, kásipkerler jáne Qaraǵandy oblysynyń belsendi jastary úshin arnaıy ótkizilgen bolatyn. Sharada árbir qatysýshy halyqty jańa jobasymen tanystyryp, alǵa qoıǵan maqsattarymen bólisti. Árbir qatysýshyǵa joba boıynsha suraqtar qoıylyp, kásipteriniń sátti jáne kem tustaryna nazar aýdaryldy.
Aıta keteıik, jobaǵa 18-29 jas aralyǵyndaǵy jastar qatysqan bolatyn. Ideıalaryn áleýmettik joba retinde usynǵan 3 myńǵa jýyq avtorǵa grant utyp alý múmkindigi berildi. Memlekettik grantty utyp alyp, búginde óz kásibin alǵa súırep júrgenderdiń biri Aıym Itbaeva. Aıym arnaıy qurylǵynyń kómegimen qus jumyrtqalaryn baqylaı otyryp, balapandardyń ósip-jetilýine jaǵdaı jasaıdy. «Qus sharýashylyǵymen aınalysý aýyldyq mekenderge óte yńǵaıly kásip. Granttyń arqasynda biz arnaıy qurylǵy satyp aldyq. Endigi kezekte 300-ge jýyq qusqa qolaıly orta jasap, jem-sýymen qamtamasyz etip otyrmyz. Bolashaqta bul kásipti ári qaraı dóńgeletip úlkeıtkimiz keledi», deıdi jas kásipker.
Barlyq qatysýshylardyń asa daıyndyqpen kelgeni birden baıqaldy. Olar óz josparlarymen beınerolık arqyly bólisip, tanystyrdy. Sondaı-aq ózderin elimizdiń belgili kásipkerleri de qoldaıdy dep senedi. Semınar sońynda úzdik startap-jobalar jarııalanyp, barlyq qatysýshylarǵa sertıfıkattar taratyldy. Bıyl Jastar jyly bolǵandyqtan, elimizde jastar kásipkerligin damytýǵa arnalǵan jobalar keńinen qolǵa alynýda. Sondyqtan da bul joba jastarymyzǵa óz ıdeıalaryn kópshilik aldynda tanystyra otyryp, keshendi qoldaý tabýyna zor úles qosady. Osyndaı jobalar jyl saıyn óz jalǵasyn taýyp, tyń jobalarmen tolyǵatyn bolady. Aıta keteıik, jyl basynan beri Qaraǵandy óńirinde oblystyq Assambleıanyń uıymdastyrýymen eki márte «Saryarqa jastary» forýmy ótken bolatyn. Onda jastar ózderiniń áleýmettik jobalaryn usynyp, iriktelgen úzdikteri atalǵan sharada tanystyryldy.
«Egemen-aqparat»
