«Gagarın alańy» - negizgi ushyrylymdardyń biri, ańyzǵa aınalǵan alǵashqy ushyrylym, sondyqtan ony keıingi keıinge qaldyrýǵa bolmaıdy» dedi Reseı ǵarysh agenttiginiń basshysy Dmıtrıı Rogozın búgin «Baıqońyr» qalalyq gazetine bergen suhbatynda.
Osyǵan deıin Roskosmos memlekettik korporasııasy men Reseıdiń tikeleı ınvestısııalar qory (RTIQ) «Baıqońyr» ǵarysh aılaǵyndaǵy Gagarın start alańyn jańartý týraly kelisimge qol qoıǵany habarlanǵan bolatyn.
«Roskosmos» baspasóz qyzmetiniń habarlaýynsha, jańartýǵa 87 mln dollar mólsherinde ınvestısııa tartylady. Joba aıasynda ǵarysh aılaǵynyń №1 ushyrý alańyn (Gagarın start alańy) jańartý jáne bul jerdi «Soıýz-2» tasymaldaýshy zymyrandaryn ushyrýǵa paıdalaný kózdelip otyr. Aqparatqa sáıkes, RTIQ jáne ózge seriktesterdiń ınvestısııalary ǵarysh aılaǵynyń jerústi ınfraqurylymyn jańartyp, Reseıdiń ǵarysh ónerkásibiniń básekege qabiletin arttyrýǵa septigin tıgizedi.
«Bul prosestiń qatysýshylaryna keletin bolsaq, bul eń aldymen Reseı, Qazaqstan, Birikken Arab Ámirlikteri. Taraptardyń jarnalarynyń mólsheri áli belgisiz. Bul baǵdarlamanyń qandaı merzimge eseptelgeni, tehnıkalyq qaıta qurýǵa qansha ýaqyt qajet bolatyny týraly úshjaqty formatta qarqyndy pikirtalastar ótip jatyr. Oryndalý merzimi úsh jyl dep josparlap otyrmyz. Sondyqtan biz Abý-Dabı men Nur Sultannan kelgen áriptesterimizben kelissózderdi jalǵastyramyz» dedi Dmıtrıı Rogozın.
Rogozınniń túsindirýinshe, ǵaryshkerler ǵaryshqa 2030 jylǵa deıin «Gagarın alańynan ushyrylady. «Múmkin odan keıin de. Qazir ol jerge qarapaıym «Soıýz-2.1a» nemese «Soıýz-2.1b» negizin ornatamyz ba, álde kóptegen maman usynyp otyrǵan eki satyly raketa baǵytyndaǵy «Soıýz-6» negizin ornatsaq pa degen eki nusqa bar» dedi «Roskosmos» basshysy. Qaıta jasaqtaý jumystary úsh jylǵa jalǵaspaq» deıdi Roskosmos basshysy.
Osy oraıda Dmıtrıı Rogozın «Soıýz-6» raketasy «Nazarbaev bastaýynan» synalatynyn atap ótti. Al «Soıýz-6» raketasynyń qurastyrylyp jatqandyǵy týraly aqparattar jýyrda ǵana belgili bolǵan. Buǵan deıin «Gagarın bastaýynan» sońǵy «Soıýz-FG» raketasy ushty degen aqparat taraǵan bolatyn. Keıin alań modernızasııalaýǵa jabyldy.
Esterińizde bolsa, Reseı prezıdenti Vladımır Pýtın 7 qyrkúıek kúni Elbasy Nursultan Nazarbaevtyń Reseıge sapary kezinde «Báıterek» ǵaryshtyq zymyran keshenine Qazaqstannyń Tuńǵysh Prezıdenti Nursultan Nazarbaevtyń esimin berýdi usynǵan bolatyn.
Arada aı ótpeı jatyp Reseı jaǵy almaqtyń da salmaǵy baryn eskertip otyr.
