О́ziniń sózinde E.Baıanǵazın departamenttiń qyzmeti jazalaý baǵytyna emes, qylmystyń aldyn alýǵa baǵdar alǵanyn atap ótti. Sonyń ózinde ústimizdegi jyly 105 qylmys tirkelgen. «Barlyǵy 211 qylmysty is boıynsha tergeý júrgizildi, onyń ishinde 142 is sottyń qaraýyna jiberildi. Tergeýi aıaqtalǵan qylmysty ister boıynsha 616,4 mln teńgeniń zalaly anyqtalyp, onyń 608,7 mln teńgesi qalpyna keltirildi. Sonymen birge 58,8 mln teńgeniń múlki tutqyndalyp otyr», - dedi Ernar Baıanǵazın.
Sybaılas jemqorlyqqa qol bylǵaǵandardyń arasynda 9 adam memlekettik organdardyń basshysy bolǵan. Onyń tórteýi oblystyq, beseýi aýdandyq deńgeıdegi bastyqtar bolyp shyqqan. Barlyq sottalǵandardyń sany - 27 adam.
Brıfıngtiń barysynda BAQ ókilderi «para berme!» degen chellendjdi qoldaıtyndaryn jarııalady. Qazir ony Qazaqstannyń barlyq aýmaqtary qoldap otyr. Alaıda Ernar Baıanǵazın adamnyń sana sezimi ósip, para alý men berýden tyıylýǵa kózderin jetkizbese, eshqandaı nasıhatshyl urandardan nátıje shyqpaıtynyn aıtty.
«Máseleni tek para berý arqyly sheshýdiń ózi – qoǵamnyń keri ketýine ákeletinin árbir adam uǵynýy kerek. Sonda ǵana biz bul indetten arylamyz» dedi Ernar Baıanǵazın.
Soltústik Qazaqstan oblysy
