Jobanyń maqsaty – egistik aýdany men tyńaıǵan jer kólemin anyqtaý, egin egý jumystarynyń qarqyndylyǵy boıynsha monıtorıng jasaý, jaramdy jáne jaramsyz jer týraly aqparat berý. Buǵan egis alqaptaryn aramshóptiń jaılap ketý deńgeıin anyqtaý jumystary da kiredi. Al stýdentter munyń bárin ǵarysh monıtorıngi arqyly zertteıdi.
Jalpy, jumys barysy kosmosýretterdi júkteýden bastalady. Olar: modis, landsat, sentinel sekildi túrlerge bólinedi. Sol túsirilimderdi qoldana otyryp, alqaptardy sıfrlandyrý jumysy bastalady. Osy túsirilgen sýretter arqyly ndvi (ósimdikterdiń normalanǵan salystyrmaly) ındeksin eseptep, búkil vegetasııalyq kezeń baqylanady.
Aqtóbe oblysyna jasaǵan issapary barysynda GPS navıgatormen jumys jasaıtyn qyzmetkerler men agronom mamandar ákelgen maǵlumattardy joǵarydaǵy tásil boıynsha stýdentter zertteýde.
Nátıjesinde suranys bergen organǵa jerden alynǵan naqty derekter men ǵaryshtan túsirilgen sýretter arqyly baqylanǵan jáne anyqtalǵan ındeksterdiń arqasynda alqap týraly mańyzdy aqparattar usynylady. Iаǵnı, Aqtóbe oblysy ákimdigine jalpy statıstıkany stýdentter bere alady. Bul olar úshin ońtaılandyrylǵan qyzmet bolar edi. Mundaı qyzmet arqyly memleketten jalǵa alǵan jerin kádege jaratyp otyrǵandar men paıdalanbaı kelgender týraly da anyqtaýǵa bolady.
Jumys júrgizý úshin ArcGIS (ArcMap), MS Excel kompıýterlik baǵdarlamalary jáne EOS – Land viewer, USGS – Earth Expoler ınternet júıeleri qoldanylyp otyrady. Al aldaǵy ýaqytta GIS IT-dyń kómegimen osy jumystardy odan ári júıeleý josparlanǵan.
