Sońǵy jyldary aqparattyq-kommýnıkasııalyq zaman aǵymyna saı kúndelikti sabaqqa kompıýter, elektrondy oqýlyq, ınterbelsendi taqta, beıne jáne aýdıo qondyrǵylardy qoldaný aıtarlyqtaı nátıje berýde. Bilim berý júıesi elektrondy baılanys, aqparat almasý, ınternet, elektrondy poshta, telekonferensııa, on-line sabaqtar arqyly iske asyrylýda.
Sondaı-aq zamanaýı aqparattyq tehnologııalar únemi qarqyndy ósip kele jatqan jekelegen korporasııalar men qoǵamdaǵy eńbekti uıymdastyrý, eńbekpen qamtýdyń jańa formalary úshin úlken múmkindikter ashady. Mundaı múmkindikterdiń ósýi adam ómiriniń jańadan engen barlyq salalaryna, otbasyna, jumysqa, adamzat qoǵamynyń geografııalyq shekaralaryndaǵy barlyq salalarǵa áser etedi. Búgingi tańda aqparattyq tehnologııalar eńbek ónimdiligin, óndiris kólemin, ınvestısııalar men eńbekpen qamtý arasynda ózara baılanystardy bekitýde eleýli úles qosa alady. Jeli boıynsha taratylyp otyrǵan qyzmetterdiń jańa túrleri kóptegen jumys oryndaryn ashýǵa qabiletti, muny sońǵy kezdegi tájirıbeler rastap otyr.
Taıaýda elordada Sıfrlyq damý, ınnovasııalar jáne aeroǵarysh ónerkásibi mınıstrligi Aeroǵarysh komıtetiniń qoldaýymen AgriTechHub Kazakhstan atty forým ótti. Nátıjesinde aldaǵy ýaqytta Qazaqstanda NASA ortalyǵynyń ashylýy kózdelýde.
«Jerdegi ózgeristerdi baqylaý: Sý, energetıka, azyq-túlik qaýipsizdigi jáne Ortalyq Azııa men Kavkazdaǵy turaqty damý» konferensııasyna NASA shtab-páteriniń ókilderi, Merılend shtatynyń ýnıversıteti, Mıchıgan shtatynyń ýnıversıteti, Elladadaǵy zertteýler jáne tehnologııa ortalyǵy (Grekııa), «Qazaqstan Ǵarysh Sapary» ulttyq kompanııasynyń ókilderi qatysqan edi.
Konferensııada Sıfrlyq damý, ınnovasııalar jáne aeroǵarysh ónerkásibi vıse-mınıstri Marat Nurǵojın sóz sóıledi. «Ǵaryshtan baqylaý Jerdi monıtorıngileýde kóp múmkindik beredi. Bul jerde baqylaý men navıgasııa júıesiniń orbıtalyq jáne jer ústi komponentterin qurý ǵana emes, qashyqtyqtan zondpen baqylaýdy tıimdi paıdalanýdy uıymdastyrý, ǵaryshtyq monıtorıng júıesin eldiń áleýmettik-ekonomıkalyq jáne ınnovasııalyq damýyn jedeldetetin baǵdarlamalarmen biriktirý áldeqaıda mańyzdy», deıdi vıse-mınıstr. «Qazaqstanda zamanaýı ǵaryshtyq ınfraqurylym quryldy, ǵaryshtyq jabdyqtar men tehnologııalardyń otandyq úlgilerin damytýda úlken jetistikterge qol jetti. Olardyń qatarynda jerdi qashyqtyqtan zondtaý ǵarysh júıesi bar. Ol Jerdegi ǵarysh apparattaryn basqarý kesheni men qashyqtyqtan zondtaý ǵarysh kemesinen málimetterdi qabyldaý jáne óńdeýge arnalǵan jerdegi maqsatty keshen eki optıkalyq qurylǵylardyń quramynda jumys isteıdi», degen vıse-mınıstr Qazaqstandaǵy ǵarysh salasyn damytý týraly da sóz qozǵady.
Jerdi qashyqtyqtan zondtaý – biz úshin aıtarlyqtaı jetistik. Bul arqyly ekonomıkalyq jáne áskerı salalardyń jumysyn jandandyrýǵa bolady. Ol úshin ǵaryshtyq jáne aerofototúsirilim nátıjelerin ýaqtyly zertteý qajet.
Adamzat úshin XXI ǵasyr jańa tehnologııalardyń ǵasyry bolmaq. Al osy jańa tehnologııalardy júzege asyryp, ómirge engizý, ıgerý jáne jetildirý – búgingi jas urpaqtyń enshisinde.
