Joba jasaýshylarynyń aıtýynsha, Face PAY – bıometrııalyq málimettermen basqarý júıesi. Bul ártúrli mindetterdi adamdardy taný fýnksııasy arqyly sheshe alady. «Astana LRT» JShS úshin bul bastama – jolaqy tóleýdiń elektrondy júıesin jolaýshylarǵa yńǵaıly etýdiń taǵy bir múmkindigi. Kompanııa qoǵamdyq kólikti jáne onyń tólem júıesin damytýda árqashan jańa múmkindikter úshin ashyq. Qazir tólemniń jańa tásili tehnıkalyq testileýden ótýde. Face PAY júıesiniń artyqshylyqtary: jeńildetilgen jáne yńǵaıly tólem, 60 mınýt ishinde tegin aýysyp otyrý, bıletteýdi avtomattandyrý, baǵdarlyq kólikti monıtorıngileý, jolaýshylar aǵynyn taldaý, geolokasııa boıynsha tarıfteý, klıentti sanattandyrý, avtokólikti esepke alý, saparlardy naqtylaý. Face PAY arqyly qoǵamdyq kólikte jol aqysyn tóleý úshin telegramda @facepay_bot bot baǵdarlamasyn tabý, JSN nómirińizdi tirkeý, sýretke túsý, bank kartasyn engizý kerek.
Jolaýshy óz derekterin paıdalanýǵa ruqsat bergennen keıin, jabdyq ornatylǵan avtobýsqa kirip, jol aqysyn tóleı alady. Bılet dereý telegram-ǵa keledi. Ázirleýshiler habarlaǵandaı, paıdalanýshylardyń jeke derekteri senimdi qorǵalady.
«Bıometrııalyq (bet-beıne arqyly) tóleý júıesi bizdiń seriktesterimiz IPAY jáne ForteBank-pen jasaǵan qanatqaqty jobamyz. Osy jobanyń testileý nusqasyn 1 apta buryn qalalyq 10 jáne 5-avtobýstarda júrgizýdi bastadyq. Qazir osy tóńirektegi jumystardy jalǵastyrý ústindemiz. Qanatqaqty joba bizge bastalǵan istiń kemshiligin nemese artyqshylyǵyn anyqtap, onyń tolyqtyratyn, bolmasa alyp tastaıtyn jerlerin saralaýǵa múmkindik beredi. Qazir «Astana LRT» JShS kóptegen tólem júıelerin engizip otyrǵany belgili. Onyń ishinde karta, banktik karta, sonymen qatar sms habarlamalar arqyly tóleıtin 8 baǵdarlama bar ekenin aıta ketý kerek. Bul jerde turǵyndar qoǵamdyq kólikte ózine yńǵaıly túrin paıdalaný arqyly jolaqysyn tóleıdi. Buǵan deıin Qytaıda Alibaba kompanııasy tamaqtaný oryndaryna arnalǵan Alipay degen ataýmen tólem júıesin engizgen bolatyn. Sonymen birge Ulybrıtanııada metro jolaqysyn tóleý úshin bastaǵan júıe tolyq iske asyrylmaǵan. Al bizdiń qoǵamdyq kóliktegi bıometrııalyq tóleý júıesi alǵashqy joba dep aıta alamyz», dedi «Astana LRT» JShS basqarýshy dırektory, basqarma múshesi Dáýren Nuralıev.
Aıta ketetin taǵy bir jaıt, 2018 jyldan bastap elorda qoǵamdyq kólikteri tolyqtaı elektrondy tólem júıesine kóshken bolatyn. Sol jyldyń qyrkúıeginen bastap SMS jáne QR-kod arqyly jolaqysyn tóleý engizildi. Al «Senim», «Ipay», «SMSBAS», «OYBY» mobıldik baǵdarlamalarynyń erekshelikteri – uıaly telefon arqyly jolaqysyn dereý tóleýge múmkindik beredi.
