Ekibastuzdaǵy Estaı atyndaǵy mýzyka mektebinde Zeken Janábilqyzynyń 90 jyldyǵyna arnalǵan rýhanı mádenı shara ótti.
Byltyr Estaı Berkimbaıulynyń 150 jyldyǵy toılanǵan edi. Oblys ákimi Bolat Baqaýovtyń bastamasymen mýzyka mektebine Estaıdyń esimi berilgen-di.
Ánsúıer, ónersúıer halyq jınalyp, Zeken ájege úlken qurmet kórsetti.
–Áýlıeli Aqkól-Jaıylmanyń ánshilik ortasy atamyzǵa da ánshilik ǵumyr berdi, boıyna darqan daryn syılady, – dedi ájemiz sahna tórinen ún qatyp.
Aıtqandaı-aq Estaı ánshi Qorlan qyzǵa qoly jetpeı, Umsynǵanǵa úılenedi. Umsynǵan ekeýinen qos ájeniń ákeleri Janábil bar tórt bala ómirge keledi. Janábil 41-diń soǵysynda qaza tabady. Analary da qaıtys bolady.
Sóıtip ekeýi Estaı men onyń ekinshi áıeli Zaǵıshanyń qolynda ósedi.
Aýyldastary kezinde Estaı «Sarytorǵaıym» dep erkeletken Zeınesh ájemiz jas kúninde keremet án aıtqanyn, búginde ol kisiniń de 80 jastan asyp bara jatqanyn eske aldy. Jasy 90-ǵa kelgen Zeken ájeniń de yńyldap án aıtatyn ádeti bar eken.
Osyndaı qyzyqty estelik-áńgimelerden-aq ánshi Estaı jaıly qos ájeniń kórip-bilgenderi jazyp alarlyq dúnıe ekenin uǵasyz.
Osy kúnge deıin tabylmaǵan Qorlan qyz syılaǵan júziktiń ózi bir hıkaıatqa turarlyq.
–Ekibastuz qalalyq tarıhı-ólketaný mýzeıinen Estaı zaly ashyldy. Aqyn-ánshiniń tutynǵan jeke zattary, urpaqtarynan alynǵan eski dúnıeler, dombyrasy, shamadany bar. Nemere inisi Káribaıdyń da dombyrasy osynda tur. Estaı inisiniń úıine qydyryp barǵanda sol dombyrany tartyp, án shyrqaıdy eken, – deıdi aqynnyń urpaǵy, jýrnalıst Farhat Ámirenov.
Aıtýynsha, áýletterine qundy jádiger – eki shamadandy da mýzeıge bergen. Estaı aqyn 1939 jyly Almatyǵa barǵanda ákelgen eken. Birin Zeken apaǵa, ekinshisin nemere inisi Qyzdarbek ataǵa tartý etipti.
Al Zeken ájeniń 90 jyldyǵyna arnalǵan keshte estelikter, ǵıbrat alarlyq áńgimeler aıtyldy. Keshte Medǵat Manap, Amangeldi Qojanov, Janbolat Baısoltan, Nurjan Sarqambaevtar áýelete án saldy.
Kúıshi Qaırat Aıtbaev kúmbirletip kúı shertti. Mýzyka mektebiniń jas talanttary da óz ónerlerin kórsetti.
Kesh sońynda 90 jastaǵy Zekendeı asyl ájemiz jınalǵan qaýymǵa alǵys aıtyp, batasyn berdi.
Pavlodar oblysy,
Ekibastuz qalasy
