Bıyl 9 aı ishinde avtodıllerler satqan avtokólikterdiń jalpy quny 499,8 mıllıard teńgeni qurapty. Bul byltyrǵy kórsetkishten 19 paıyzǵa joǵary. Qaýymdastyqtyń habarlaýynsha, jyl basynan beri eń kóp satylǵan kólikterdiń kóshin Lada bastap tur. Lada dıllerleri 9 aıda 11 092 kólik satyp, byltyrǵy mejeni 15 paıyzǵa asyra oryndapty. Qyrkúıek aıynyń ózinde el azamattary túrli markadaǵy 957 Lada kóligin taqymǵa basqan.
Ekinshi orynda Toyota tur. 9 aıda 10 525 Toyota satylǵan. Qyrkúıek aıynda dılerler 1 204 kólik ótkizipti.
Qostanaıdaǵy «SaryarqaAvtoProm» zaýytynda qurastyrylatyn Hyundai eń ótimdi kólikterdiń úshtigin túıindeıdi. Jyl basynan beri respýblıka boıynsha 100 myńnan artyq Hyundai satylyp, byltyrǵy meje 76 paıyzǵa asyra oryndalǵan. О́tken aıda qostanaılyq zaýyttan shyqqan 1 345 Hyundai ıesin taýypty.
Otandyq avtoóndiristiń kóshbasshysy sanalatyn «SaryarqaAvtoProm» syrtqy naryqqa kólik eksporttaıtyn jalǵyz kompanııa ekenin de aıta keteıik. Bıyl osy zaýytta qurastyrylatyn JAC, Hyundai syndy 1 243 kólik Reseı, Qyrǵyzstan, Belarýs elderine eksporttalypty.
– Qazaqstanda qurastyrylǵan avtokólikterge degen suranys ýaqyt ótken saıyn artyp kele jatqany baıqalady. Ár aı saıyn avtonaryqqa júrgizilgen zertteý qorytyndysy boıynsha otandyq ónimniń úlesi 50 paıyzdan túsken joq, – deıdi avtobıznes qaýymdastyǵynyń baspasóz qyzmetiniń ókilderi. Bıyl 9 aıda elimizde túrli tıptegi 33 500 kólik qurastyrylypty. Bul kórsetkish jyl sońyna deıin 40 myńnan asyp túsýge tıis.
Otandyq kólikter saýdasynyń qyzýyna 4 paıyzdyq syıaqymen 20 jylǵa deıin beriletin avtonesıeleý baǵdarlamasy yqpal etip otyr. Osy baǵdarlama úshin Ulttyq bank 14,5 mlrd teńge bólgen bolatyn. Ekinshi deńgeıli bankterge jyl sońyna deıin taǵy 5,5 mlrd teńge berilmek.
