Qýatty «Kıroves» traktory endi Qostanaıda shyǵady

Mine, endi «Peterbýrg traktor zaýyty» AQ (PTZ) qýaty joǵary traktorynyń jańartylǵan, jańǵyrtylǵan nusqasy Qostanaı traktor zaýytynan shyǵaryla bas­tady. Joba eki el arasynda osy jyldyń sáýir aıynda kelisilgen bolatyn. Jańa Qostanaı traktor zaýyty oblys ortalyǵyndaǵy Indýstrııalyq aımaqqa ornalas­tyrylǵan. Jańa zaýyttyń ashylý rásimine Elbasy Nursultan Nazar­baev bastamashy bolǵan Indýs­trııalyq-ınnovasııalyq damý mem­le­kettik baǵdarlamasynyń iske asyrylýyna, sondaı-aq Memleket basshysy Qasym-Jomart Toqaevtyń Qostanaı oblysynyń ónerkásiptik áleýetin damytý jónindegi tap­syr­malarynyń oryndalýyna baqylaý ornatý aıasynda óńirge jumys saparymen kelgen Premer-Mınıstr Asqar Mamın qatysty. Úkimet basshysy jobany joǵary baǵalady.

–Bul óndiris elimizdiń aýyl sharýashylyǵyn otandyq jáne senimdi, sapaly tehnıkamen qamta­masyz etetin bolady. Peterbýrg traktor zaýytymen yntymaqtasa jumys isteý Qazaqstan men Re­seıdiń ónerkásiptik kooperasııaǵa qatysýyn nyǵaıtty. Bizdiń reseılik áriptesimizge ónerkásip kooperasııa­syna belsendi qatysqany úshin rızashylyǵymdy bildiremin. Qazaqstan aýylsharýashylyq tehnıkalaryn óndirýdi keńeıtýge múddeli. Aldaǵy ýaqytta ony eks­portqa shyǵarýymyz, jergilik­ten­dirýdi keńeıtýimiz, servıs deń­geıin kóterýimiz kerek. Bul joba otandyq mashına qurastyrý isiniń strategııasy ekenin kórsetti, al bul memleket tarapynan ár ýaqyt­ta qoldaýǵa ıe bola beredi, – dedi Asqar Mamın quttyqtaý sózin­de. «Peterbýrg traktor zaýyty» AQ (PTZ) bas dırektory Sergeı Sereb­rıakov aldaǵy ýaqytta eki jaqtyń ynty­maqtastyǵymen naryqty joǵary sapaly tehnıkalarmen qamtamasyz etýge senimdi ekenin aıtty.

–Búginde aldymen áriptester tarapynan joǵary jaýapkershilikti sezip turmyn. Jańa tehnologııalyq deńgeıge jetý, kadrlardy daıar­laý, is bastaý ońaı emes edi. So­nyń barlyǵy da týra aıtqan ýa­qytta júzege asyp jatyr, oǵan Qazaqstan Úkimeti, oblys ákimdigi, qos zaýyttyń mamandary múmkindik jasady. Aldaǵy ýaqytta qol qoıylǵan kelisimder sheńberinde bizdiń baılanysymyz arta beretin bolady, – dedi Sergeı Serebrıakov.

Qostanaı traktor zaýytynyń jumysyn bastaǵan seh óndiristiń alǵashqy satysy bolyp tabylady, oǵan 2 mıllıard teńge ınvestı­sııa salyndy. Ekinshi, úshinshi saty­sy 2025 jyly aıaqtalady. Ol kezde jylyna 700 traktor sapqa qoıylatyn bolady, 500 qostanaı­lyq jumyspen qamtylady. Eń bas­tysy, sehta traktor sapqa qoıylǵanǵa deıingi jumystyń 50 paıy­zy jergiliktendiriledi. Kelesi jyly Qostanaı zaýytynda «Kıroves» qýaty joǵary trakto­rynyń plastıkalyq bólikterin shyǵarý qolǵa alynady. 2021 jyldan bastap joǵary qysym, ballast júkteriniń tútikterin, 2025 jyldan bastap, kabınalar, baktar, kótergish jaqtaýlar, dıskiler, kardan biligi, teńdestirgish daıyn­daý jáne taǵy basqa qajetti bólikterdiń barlyǵy óndiriledi. Úsh kezeńde iske asyrylatyn jobaǵa salynǵan ınvestısııalardyń jalpy kólemi 7 mıllıardtan astam teń­geni quraıdy. Birte-birte jergi­liktendirýdiń tarazy basy osylaı salmaqtana bermek. Búginge deıin 40 shaqty traktor sapqa qoıylǵan, onyń altaýy satylyp ta úlgerdi.

Qostanaı traktor zaýytynyń ashylý rásiminde Premer-Mı­nıs­tr­diń qatysýymen «Peterbýrg traktor zaýyty» AQ (PTZ) bas dırektory Sergeı Serebrıakov já­ne Qazaqstan avtobıznes qaýym­­dastyǵynyń prezıdenti Andreı Lavrentev «PTZ» AQ-nyń Qos­­tanaı traktor zaýytynyń jarǵy­lyq kapıtalyna kirýi týraly keli­simge qol qoıdy. Osydan keıin Asqar Mamın men Sergeı Sereb­rıakov «Kıroves» qýaty joǵary traktoryna minip, synap kórdi.

Úkimet basshysy Asqar  Mamın oblys ákimi Arhımed Muham­be­tovpen birge Qostanaı qalasyndaǵy «Qostanaı-MBI» úı qurylysy kombınatyna, qaıta jańǵyrǵan «Bolshevıchka» ónerkásip koope­ratıvine bardy.

QOSTANAI