Altyn Orda mańyndaǵy aınalma joldyń qurylysy 70 paıyzǵa aıaqtaldy. Jóndeý jumystarynyń júrgizilýine kedergi bolyp turǵan nysandardyń biri – janar-jaǵarmaı beketi. Beıresmı málimetterge súıensek, onyń ıesi ákimdik tarapynan baǵalanyp belgilengen aqshamen kelispeı, odan eki ese kóp qarajat surap otyr.
Osylaısha, «Qazavtojol» ulttyq kompanııasy «Altyn orda» mańyndaǵy kúrdeli jóndeý jumystary qarqynynyń baıaýlap qalǵanyn birneshe sebeptermen túsindirdi. Onyń biri – jobalyq-smetalyq qujattarda kórsetilmegen qosymsha jumystardyń shyǵýy. Demek, 2017 jyly jasalǵan jobalyq-smetalyq qujatqa jol boıyna salynǵan myna jańa nysandar kirmegen. Bul óz kezeginde halyqtyń yńǵaılyǵy úshin jasalatyn aıaldamalardyń ornalasýyn, qosymsha kirip-shyǵý joldarynyń baǵyt-baǵdaryn ózgertýge sebep bolyp otyr. «Áıtse de, qazir jumystardyń birazy jasalyp qoıdy», deıdi kompanııa ókilderi.
Qazavtojol» UQ AQ Almaty oblystyq fılıaly dırektorynyń orynbasary Nurhat Aqyltaev keshe jýrnalıstermen kezdesken kezde aınalma estakadanyń betonyn quıyp, bıyl bitirýge tyrysyp jatqanyn aıtty.
«Aport» jáne «Altyn orda» bazary mańyndaǵy jaıaý júrginshiler jolynyń júrý bóligin daıyndap, basqa metallokonstrýksııa daıyndaıyn zaýytta jasalyp jatyr. Bireýi 100 paıyzǵa daıyn, ekinshisi 70 paıyz daıyn. Jyl sońyna deıin ony da bitirýdi josparlap otyrmyz», dedi ol.
Qala ákimdigi de mundaǵy joldyń qurylysyna «Qazavtojol» kompanııasy jaýapty dep otyr. Al Almaty qalasynyń balansyna berilý jaǵdaıy tek qurylys jumystary tolyq aıaqtalǵannan keıin belgili bolmaq.
«Qazir Raıymbek dańǵyly, Tashkentskıı trakt joly respýblıkalyq mańyzy bar bolǵandyqtan, Almaty qalasynyń balansyna kirmeıdi. Bul «Qazavtojol» UK AQ-nyń balansynda bolǵandyqtan, olar qazir rekonstrýksııa júrgizip jatyr. Qurylys jumystarynyń qashan aıaqtalatyny bizge belgisiz. О́ıtkeni tapsyrys berýshi sol mekeme», dedi Almaty qalasy Mobıldilik basqarmasynyń bas mamany Aıdyn Toıbazarov.
Qurylys jumystarynyń kesheýildeýine sebep bolǵan taǵy bir jaıt – qurylys materıaldarynyń qymbattaýy. Osydan eki jyl buryn jasalǵan jobalyq-smetalyq qujatta kórsetilgen bıtým baǵasy qazir 2 esege sharyqtaǵan. Bul óz kezeginde merdiger kompanııanyń qarjylyq qıyndyqtarǵa tap bolýyna ákep soqtyrǵan. Deı turǵanmen, kompanııa ókilderi turǵyndardyń bul jaǵdaılarǵa túsinistikpen qaraýyn suraıdy.
«Burynǵy joldy qazirgimen salystyrsaq, 4 jolaqty jol bolǵan, qazir de solaı. Biz eshqandaı shekteý qoıǵan joqpyz, joldy japqan joqpyz. Kerisinshe, júrý jolaqtaryn kóbeıtip jatyrmyz», dedi «Qazavtojol» UQ AQ Almaty oblystyq fılıaly dırektorynyń orynbasary Nurhat Aqyltaev.
Kompanııa tarapynan qajetti is-shalar jasalyp jatyr. Bıylǵy jospardan qalyp jatqanymen, barlyq jumystardy kelisim-shart jáne jospar boıynsha 2020 jyldyń sońynda aıaqtaý kózdelip otyr.
ALMATY
