Osyǵan deıin Qanat Islam kásipqoı rıngte 26 jekpe-jek ótkizip, sonyń barlyǵynda jeńis toıyn toılap, 21 qarsylasyn esinen tandyrǵanyn jaqsy bilemiz. Sol sebepti jankúıerlerdiń deni bul joly da qandasymyzdyń aıqyn basymdyq tanytatyna kúmándanǵan joq. Biraq bári biz oılaǵandaı bolmady. Ýolter Kaýtondokva sharshap-shaldyǵýdy, bir sátke de damyldaýdy bilmeıtin, únemi shabýyl ótinde júretin, naǵyz «sen tur, men ataıynnyń» ózi eken.
Rasynda da bul sportshynyń kórsetkishi adam qyzyǵarlyqtaı. 34 jastaǵy Namıbııanyń týmasy osy sport túrin serik etken alty jyldan asa ýaqyt aralyǵynda19 márte rıngke kóterilip, 18 ret jeńiske jetti. 17 qarsylasyn esinen tandyrdy. Sharshy alańda ol tek búgingi tańda aldyna jan salmaı júrgen, ataǵy alysqa jaıylǵan AQSh boksshysy Andrade Demetrıýstan ǵana utyldy. Sonyń ózinde tek upaı sanymen ǵana. Mine, osy jaıttyń barlyǵy Kaýtondokvanyń qarymdylyǵyn baıqatady.
Aıtqandaı-aq, báseke óte shıelenisti ótti. Alǵashqy raýnd barlaýmen ótse, odan keıingi úsheýinde Qanat sál alymdy kórindi. Ol jyldam qımyldap, únemi Ýolterdiń aldyn orap otyrdy. Birneshe jaqsy soqqylar da jumsady. Naǵyz «qyzyqty» biz besinshi raýnda kórdik. Soqqylar almasý barysynda qandasymyz nıgerııalyqty uryp jyqty. Tóreshi esep ashty. Nokdaýn! Búkil zal dúr silkindi. Bári de aıǵaıǵa basyp, jerlesterine barynsha qoldaý kórsetti. Sport saraıyna jınalǵan dúıim jurt Islamnyń endi óz múmkindigin qalt jibermeıtinine qatty sendi. Biraq Kaýtondokva óte tózimdi ári namysqoı eken. Ornynan tura sala, Qanatqa qaraı umtylǵan ol eki birdeı soqqysyn dál darytty.
Altynshy raýndtan bastap, qara qurlyqtyń ókili damylsyz shabýyldady. Shyny kerek, Ýolter bizdiń jigitke qaraǵanda tyń kórindi. Soqqylary da dittegen jerine dóp tıip jatty. Qanat qasha júre, urys salýǵa bekindi. Onyń sharshap qalǵany anyq baıqaldy. Biraq namysqa tyrysqan qandasymyz ara-tura shabýyldap, ese qaıyrýǵa tyrysty. Dál osyndaı kórinis básekeniń sońyna deıin jalǵasty.
10 raýndtyq aıqas aıaqtalǵannan keıin jankúıerler tóreshilerdiń sheshimin taǵatsyzdana kútti. Sebebi, dáp sol mezette kimniń utqanyn eshkim dóp basyp aıta almaıtyn edi. Jankúıerlerdiń deni teń esep tirkeletin shyǵar degen oıda boldy. Alaıda birer mınýtqa sozylǵan úzilisten keıin tóreshiler Qanat Islamnyń jeńiske jetkenin jarııa etti. Osylaısha, qazaq boksshysy altyn belbeýin saqtap qaldy.
Osy keshte taǵy segiz reıtıngtik jekpe-jekter uıymdastyryldy. Arman Rysbek (78 kılo) pen Muhıddın Radjabov arasyndaǵy báseke birinshi raýndtyń aıaqtalýyna 58 sekýnd qalǵanda toqtatyldy. О́z shákirtteriniń qarymdy qazaqqa esh qaırat kórsete almaıtynyn túsingen ózbekstandyq bapkerler rıngke aq oramal laqtyrdy. Báseke bastalǵan bette Nursultan Amanjolov (+91 kılo) latvııalyq Edgars Kalnarsty óziniń aýyr soqqysymen eseńgiretip tastady. Baltyq jaǵalaýynan kelgen boksshy ekinshi raýndqa shyǵýdan bas tartty. Al Dáýlet Dáýkenov (63,5 kılo), Saparbaı Aıdarov (74 kılo), Asqar Erýbek (63,5 kılo) jáne Rýslan Myrsataev (+91 kılo) óz qarsylastaryn upaı sanymen utty.
Sonymen qatar, osy jarysta shetelde týyp-ósken qos qandasymyz da óner kórsetti. О́zbekstannyń Shyrshyq oblysynda dúnıege kelgen Beksultan Raýshanov rýmynııalyq Aleksandrý Ionıtadan basym tússe, Qytaıdyń Altaı óńiriniń týmasy Aqtilek Jeńis ýkraınalyq Maksım Voronınmen teń tústi.
