Qazaqstandyq delegasııanyń baǵdarlamasy aıasynda keshendi sharalar ótti. Kezdesýde qozǵalǵan mańyzdy máseleniń biri qurylǵaly jatqan áskerı statýsqa ıe organdardyń jáne quqyq qorǵaý organdary áskerı vedomstvolarynyń «Eýrazııa quqyq qorǵaý organdarynyń qaýymdastyǵy» uıymy jóninde boldy. Bul uıymǵa kirý Qazaqstan úshin jalpyǵa birdeı qyzyǵýshylyq týdyratyn qaýipsizdik máseleleri boıynsha aqparat jáne tájirıbe almasýǵa múmkindik bermek. Túrkııa tarapy atalǵan Qaýymdastyqtyń qurylýyna Qazaqstanmen birge Reseı Federasııasy jáne О́zbekstan Respýblıkasy Ulttyq ulandary da atsalysýǵa nıetti ekenin málimdedi.
Túrkııadaǵy sapary barysynda qazaqstandyq delegasııa Túrkııa Jandarmerııasynyń Bas qolbasshylyǵynda Jandarmerııa Bas qolbasshysy, armııa generaly Arıf Chetın myrzamen kezdesti.
Kezdesý aıasynda Qazaqstan quqyqtyq tártip áskeriniń basshylyǵy Túrkııa Jandarmerııasynyń baılanys, avtomattandyrý, avıasııa jáne tyl baǵyttary boıynsha jaýyngerlik qyzmetimen jiti tanysty. Delegasııa músheleri, sondaı-aq Jandarmerııanyń Logıstıka jáne Avıasııa qolbasshylyqtary shtabtarynda bolyp, múmkindikteri men materıaldyq bazasyn zerdelep qaıtty.
Delegasııa basshysy general-leıtenant Rýslan Jaqsylyqov Jandarmerııa jáne jaǵalaý kúzeti akademııasynda áskerı bilim alyp jatqan qazaqstandyq kýrsanttarmen jolyǵyp, baǵyt-baǵdar berip, olarǵa oqýda tabys tiledi. Sonymen qatar bilim ordasynyń basshylyǵymen Ulttyq ulan áskerı qyzmetshilerin ári qaraı oqytý máselelerin talqylady.
Jandarmerııanyń qoǵamdyq qaýipsizdik arnaıy basshylyǵynyń quramasynda (arnaıy maqsattaǵy bólimshe) qazaqstandyq qonaqtarǵa bólimsheniń jappaı bassyzdyqtar men zańsyz sherýlerge tosqaýyl qoıý jáne terrorızmge qarsy operasııalar júrgizý kezindegi is-qımyldary kórsetildi.
Qos tarap budan bólek «Mınalar men qoldan jasalǵan jarylǵysh zattardy tabý jáne joıý» taqyrybyndaǵy daıyndyq kýrstaryna bólinetin kvotalar sanyn kóbeıtý týraly ortaq sheshimge keldi. Arys qalasyndaǵy sońǵy jaǵdaılardy eskeretin bolsaq, atalǵan taqyryptyń Qazaqstan úshin ózekti ekeni túsinikti.
