Bul kúnderi barsha qazaq jankúıerleri óz qandastarynyń tileýin tileýde. Kásipqoı rıngte kúsh synasyp júrgenine 10 jyl bolǵan Isa Aqberbaev sol aralyqta 21 kezdesý ótkizip, 20 ret jeńiske jetti. 15 qarsylasyn esinen tandyrdy. Taǵy bir jekpe-jektiń nátıjesi esepke alynǵan joq.
Sońǵy ret jekpe-jekke Isa osydan eki jyl buryn shyqqan edi. Naqtylap aıtsaq, 2017 jyldyń jeltoqsan aıynda Bosnııa men Gersegovına ókili Mırnes Denadıchti tórtinshi raýnda uryp shyǵyp, WBA Asia nusqasynyń chempıondyq belbeýin ıelendi.
Al Evgenıı Tıshenkonyń esimi qalyń kórermenge jaqsy tanys. 28 jastaǵy Krasnodar ólkesiniń týmasy áýesqoılar arasynda Olımpııa oıyndary men Dúnıejúzilik Ýnıversıadanyń jeńimpazy, álem jáne Eýropanyń eki dúrkin chempıony. Dúnıejúzilik dodanyń kúmis júldegeri. Reseı boksshysynyń basqa da tolyp jatqan ataǵy taǵy bar. Byltyrǵy jyldan beri kásipqoı rıngte baq synap júrgen ol bes kezdesýdiń barlyǵynda jeńiske jetip, úsh básekeni merziminen buryn aıaqtady.
Dál osy Tıshenko Rıo Olımpıadasynyń fınalynda bizdiń Vasılıı Levıtti altynnan aıyrǵany da jankúıerlerdiń jadynda. Aqtyq aıqastyń aqyry daý-damaıǵa ulasyp, sol básekede tóreshiler ádiletsiz sheshim shyǵarǵany jaıyndaǵy áńgime áli kúnge deıin órbýde. Endi Levıt jibergen eseni Aqberbaev qaıtarady dep úmittenmiz. Onyń ústine 5 qarashada Isanyń týǵan kúni. Ol 36 jasqa tolady. Eger qandasymyz osy jekpe-jekte jeńiske jetse, onda ol óziniń týǵan kúnine keremet syı jasaǵan bolar edi.
