Bul barsha qyzyljarlyqtardy úlken qýanyshqa bóledi. Byltyr osy lıgadaǵy oıyndy 11 orynda aıaqtaǵan komanda úshin bul úlken tabys. Búgin komandaǵa altyn medaldaryn tapsyrýǵa arnalǵan saltanatty shara boldy. Marapatty oblys ákimi Qumar Aqsaqalov, Qazaqstan Fýtbol federasııasynyń keńesshisi Seıilda Baıshaqov jáne oblystyń Qurmetti azamaty Aleksandr Lıpovoı tapsyrdy. О́ziniń fýtbolısterdi, jattyqtyrýshylar shtabyn jáne jankúıerlerdi quttyqtaǵan sózinde Qumar Aqsaqalov: «Premer-lıgaǵa ótý ońaı, biraq onda tabandy tirep, jaqsy oıyn órnekterin kórsetý ońaı emes. Elimizdiń eń jaqsy komandalarymen oınaǵanda da bizdiń jankúıerler armııasyn jerge qaratpańyzdar», dedi.
Sonymen birge ákim qazir oblysta jasóspirimder men balalar fýtbolynyń damyp kele jatqanyn tilge tıek etti. «Aldymyzdaǵy eki-úsh jylda biz barlyq aýdan ortalyqtarynda da olardyń fýtboldy damytýyna jaqsy jaǵdaı jasap, fýtbol alańdaryn turǵyzamyz», dedi ákim.
Sonymen Soltústiktiń úmiti – «Qyzyljar» joǵary lıgaǵa jol tartty. Árıne, bul onyń bolmaǵan jeri emes edi. Kezinde, dálirek aıtsaq, 1999 jáne 2000 jyldary ol Premer-lıgada ekinshi oryn alǵan. Al 2001 jyly úshinshi orynǵa jyljyǵan. Odan keıingi jyldary joly bola qoımady. Aqyry birinshi lıgaǵa túsip qalǵan edi. Endi mine, qaıtadan Olımptiń shyńyna kóterilip otyr. Barlyq soltústikqazaqstandyqtar olarǵa «jol bolsyn» aıtýda.
