Búgingi tańda maıtalman mamandar men bilikti bapkerlerden bastap, barlyq BAQ ókilderi «Aldaǵy ýaqytta Alvares kimmen judyryqtasýy múmkin?» degen áńgimeni san saqqa júgirtýde. Osy oraıda, bes boksshynyń esimi erekshe atalýda. Olar – qazaqstandyq Gennadıı Golovkın, brıtanııalyq Kallým Smıt pen Bıllı Djo Sonders, reseılik Dmıtrıı Bıvol men Artýr Beterbıev. Árıne, qazirgi kezde kópshilik GGG men Kanelo arasyndaǵy trılogııany kórgisi keledi. Alaıda Meksıkanyń óreni Genadıı Golovkınmen qaıta kezdesýge asa qulshynyp otyrǵan joq. Sol sebepti ol kelesi jyldyń basynda joǵaryda esimderi atalǵan ózge tórt sańlaqtyń birimen saıysqa túsýi múmkin.
Jasyratyny joq, aıtýly órenderdiń barlyǵy da myqty. Máselen, Ulybrıtanııanyń qos ókili osy kúnge deıin jeńilgen emes. Kallým Smıt 26 ret basymdyq tanytyp, 19 qarsylasyn esinen tandyrdy. Bıllı Djo Sonders 27 márte jeńiske jetip, 13 kezdesýdi merziminen buryn aıaqtady. Dmıtrıı Bıvol da shashasyna shań juqtyrmaı júr. Ol 17 ret rıngke kóterilip, 11 básekeni nokaýtpen aıaqtady. Al Artýr Beterbıevtiń kórsetkishi tipten tamasha. Daǵystannyń túlegi 15 jekpe-jektiń barlyǵynda aıqyn jeńiske qol jetkizdi.
