«Elderimiz arasyndaǵy yntymaqtastyq barlyq salada qarqyndy túrde damyp jatyr, ekijaqty qatynastardy sapaly jańa deńgeıge shyǵarýdyń negizi salyndy. Qazaqstannyń Tuńǵysh Prezıdenti – Elbasy N.Nazarbaev pen Memleket basshysy Q.Toqaev Túrkııany Qazaqstannyń mańyzdy ári strategııalyq seriktesteriniń biri retinde qarastyrady», dedi A.Mamın Ankara qalasynda R.Erdoǵanmen kezdesýde.
Qazaqstanda túrik kapıtalynyń qatysýymen 4200-den astam kompanııa tirkelgen, olar energetıka, kólik, agroónerkásip, mashına jasaý sektorlarynda, ınfraqurylymdyq qurylysta jáne basqa da salalarda qyzmet kórsetedi. Osy jyldyń 9 aıynyń qorytyndysy boıynsha ekijaqty taýar aınalymy 2,3 mlrd dollarǵa jetti, bul 2018 jyldyń sáıkes kezeńindegi kórsetkishten 68%-ǵa artyq. Osy jyldyń sońyna qaraı ekijaqty saýda-sattyq kólemi 3 mlrd dollardan asady dep kútilýde. Qazirgi kezde túrik tarapymen birlese pysyqtalyp jáne iske asyrylyp jatqan ınvestısııalyq jobalar pýly 6 mlrd dollardan asady.
Kelissózder barysynda saýda-ekonomıkalyq, ınvestısııalyq, kólik-logıstıka, aýyl sharýashylyǵy jáne basqa da salalardaǵy yntymaqtastyqty odan ári damytý máseleleri talqylandy.
A.Mamın Qazaqstannyń Tuńǵysh Prezıdenti – Elbasy N.Nazarbaevtyń monýmentine baryp, Atatúrik kesenesine gúl shoǵyn qoıdy jáne R.Erdoǵanmen birge Túrkııada ótkizilip jatqan «Bolashaqqa tynys ber» ekologııalyq naýqany aıasynda aǵashtar otyrǵyzdy. Sonymen qatar Úkimet basshysy Túrkııanyń Saýda-ónerkásip palatasynyń jumysymen tanysty, sonyń ishinde Túrkııanyń memlekettik organdaryn sıfrlandyrý jumystary da bar.
Qazaqstan Premer-Mınıstri A.Mamın Túrkııa vıse-prezıdenti F.Oktaımen Ystanbulda Qazaqstan Túrkııa úkimetaralyq ekonomıkalyq komıssııasynyń HI otyrysyna qatysty.
Is-shara qorytyndysy boıynsha saýda jáne ınvestısııalar, ónerkásip, kólik, bilim berý, densaýlyq saqtaý, týrızm tárizdi jáne taǵy basqa salalarda 65 pýnktten turatyn Birlesken is-qımyl jospary qabyldandy. Budan ózge, halyqaralyq aralas júkterdi tasymaldaý týraly úkimetaralyq kelisimge, 2019-2021 jyldarǵa arnalǵan «Jańa sınergııa» birlesken ekonomıkalyq baǵdarlamasy boıynsha is-qımyl hattamasyna, sondaı-aq Saýda jáne ıntegrasııa mınıstrligi men Saýda mınıstrligi arasyndaǵy «halal» sanatyndaǵy ónimder boıynsha yntymaqtastyqty damytýǵa baǵyttalǵan ózara túsinistik týraly memorandýmǵa qol qoıyldy.
A.Mamın men F.Oktaı 500-ge jýyq túrik jáne 100 qazaqstandyq iskerlik orta ókilderiniń qatysýymen Qazaqstan – Túrkııa bıznes-forýmyn ashty. Forým aıasynda ınfraqurylym, ındýstrııa, kólik-logıstıka salalarynda, densaýlyq saqtaýda, qarjy naryǵyn damytýda, memleket-jekemenshik áriptestikte tájirıbemen almasý jáne t.b. salalarda birlesken jobalardy iske asyrýdy qarastyratyn, jalpy quny 1,5 mlrd dollar somasyn quraıtyn 18 qujatqa qol qoıyldy. Atap aıtqanda, Qazaqstanda qatparly karton qaptama, lak-boıaý ónimderi óndiristerin, «Aqtóbe-Gebze» ındýstrııalyq aımaǵyn ashý, Túrkistan qalasyn ınfraqurylymdyq damytý, sondaı-aq Almaty men Qaraǵandyda ýnıversıtettik klınıkalar, Kókshetaý, Qyzylorda, Aqtaý, Atyraý, Aqtóbe, Tarazda kópbeıindi aýrýhanalar, Shymkent pen Aqtóbede dıagnostıkalyq ortalyqtar salý týraly ýaǵdalastyqtarǵa qol jetkizildi.
Qazaqstan Premer-Mınıstri Túrkııanyń 41 iri kompanııasynyń basshylarymen – Qazaqstan ekonomıkasynyń qazirgi áleýetti ınvestorlarymen kezdesti. Asqar Mamın túrik bıznesiniń kapıtandarymen ekijaqty kelissózder, sonymen qatar dóńgelek ústel formatynda ortaq kezdesý ótkizdi. Úkimet basshysy túrik bıznesmenderin Túrkistan qalasynyń túrki áleminiń mádenı-rýhanı ortalyǵy retinde jańǵyrýy men damýyna úles qosýǵa shaqyrdy.
Túrkııaǵa sapary aıasynda A.Mamın Qaıserı qalasyna baryp, onda 2018 jyldan bastap qyzmet kórsetetin, memleket-jekemenshik áriptestik modeli boıynsha júzege asyrylǵan Túrkııanyń densaýlyq saqtaý salasyndaǵy alǵashqy jobasyna aınalǵan qalalyq aýrýhana qyzmetimen tanysty.
