Nekesiz týǵan balalardyń eshkimniń aldynda jazyǵy joq, olardyń da baqytty bolýǵa tolyq qaqy bar. Eshkimniń aldynda olardyń eshqandaı jazyǵy joq. Sondyqtan qazaqtyń qaltaly azamattary osyndaı bóbekterge jáne olardyń qıyn jaǵdaıda tap bolǵan analaryna qamqorlyq jasaýdy 2013 jyldan beri qolǵa alǵan edi. Onyń bastaýshysy «BI-Group» holdınginiń basqarýshysy Aıdyn Rahymbaev. Onyń bastamasyn qoldaǵan qaltaly azamattar elimizdiń barlyq oblys ortalyqtarynda qıynshylyqqa ushyrap, aıaǵy aýyrlap qalǵan otyzǵa tolmaǵan qyzdarǵa qamqorlyq ortalyqtaryn qurdy. Munda jas kelinshekter balasyn týǵan soń olarmen bir jarym, eki jyldaı turyp, bópesin ósirýge múmkindik alady. Sóıtip olar toǵyz aı, on kún kótergen sharanasyn tastamaıdy. Analyq sezimderi oıanǵan soń bóbekterinen bas tartpaıdy.
Petropavl men Qostanaıdaǵy osyndaı «Analar úıin» Aıdyn Rahymbaevtyń bastamasyn qoldaǵan Dáýren Jaqsybek qarjylandyrýda. Ol bastamany alǵashqy bolyp qoldaǵan azamattardyń biri. Biz osy úıge at basyn tirep, ondaǵy tynys-tirshilikti óz kózimizben kórdik. Úıdiń qyzmetin basqarýshy Merýert Kóshimbaeva qaryndasymyz eken. Munda kelinshekterge psıhologııalyq jáne medısınalyq járdem, qujattaryn qalpyna keltirý men tólemaqylaryn resimdeýge kómek berilip, bilim jáne jumysqa ornalasýǵa yqpal etiledi eken.
Tap-tuınaqtaı, eki qabatty kottedj ǵımaratqa ornalasqan «Analar úıi» qatyp qalǵan memlekettik mekeme emes, kádimgi úıdiń jylylyǵyn sezdirip tur. Bóbekter de jylap, úıdi azan-qazan qylyp jatqan joq, bári de typ-tynysh tynystap jatyr. Osy úıde onshaqty bóbek bar deseń eshkim senbesteı.
Biz sóılesken Ásemgúl degen qyz О́zbekstannan kóship kelgen otbysydan eken. Jergilikti jerdiń bir jigitimen kóńil qosqan, alaıda, aıtýyna qaraǵanda, ol qyzdy tek ýaqytsha paıdalanýdy ǵana oılap, aıaǵy aýyrlap qalǵanyn bilgen soń ǵaıyp bolǵan... Endi úlbiregen jas qyz ana atanyp, osy mekemeden jyly uıa tapqan. «Osynda tiginshilik kýrsta oqyp-úırenýdemin. Sertıfıkat alǵan soń jumysqa turyp, sábıimdi balabaqshaǵa ornalastyramyn ǵoı» dedi ol bizben áńgimeleskende.
Barlyǵy onshaqty qyzdyń úsheýi qazaq eken. Osynda oqýǵa kelip, aıaǵy aýyrlap, bala týyp qalǵan bir qyzdy namystanǵan áke-sheshesi kórgisi kelmegenimen ájesi alyp ketipti. Qalǵan qyzdar osynda tirshilik keship jatyr.
Árıne, nekesiz bala týýǵa bolmaıdy. Alaıda aldanǵan qyzdardy da aramyzdan alastaý durys emes. Sondyqtan olarǵa jasalǵan jaqsylyqtyń da saýaby bar shyǵar.
PETROPAVL
