El Prezıdenti Qasym-Jomart Toqaevtyń alǵashqy Joldaýynda alǵa qoıylǵan mindetter men maqsattar búginge deıingi atqarylǵan irgeli isterdiń zańdy jalǵasy bolyp tabylady. Sonymen birge Joldaýdyń erekshe bir sıpaty – elimizdiń búgingi kezeńdegi damýynyń túbegeıli tustaryn zerdelep, onyń qyr-syryn josparly túrde jańǵyrtý máselesine mán berýinde bolyp tur.
Joldaýdyń ekinshi bóliminde arnaıy azamattardyń quqyqtary men qaýipsizdikteriniń qorǵalýyna toqtalady. Prezıdent: «Bizdiń aldymyzda jańa tujyrymdama negizinde tegeýrindi ásker qalyptastyrý mindeti tur.
Arysta bolǵan oqıǵalar Qarýly Kúshterde túıtkildi máseleler qordalanyp qalǵanyn kórsetti. Áskerge jumsalatyn shyǵystardy rettep, osy saladaǵy qarjy júıesin jáne jalpy tártipti nyǵaıtatyn kez keldi. Sonymen birge áskerı qyzmettiń bedelin arttyryp, Qarýly Kúshterdiń materıaldyq bazasyn nyǵaıtý qajet. Otanyna adal, kásibı turǵydan daıyndalǵan ofıserleri men áskerı qyzmetshileri bar armııamyz jańa geosaıası jaǵdaılarda el qaýipsizdigine qaýip tóndiretin qaterlerge toıtarys berýge daıyn bolýy kerek» – dep atap kórsetti.
Osy rette Jambyl oblystyq qorǵanys isteri jónindegi departament ujymy Joldaýdaǵy kórsetilgen mindetterdi oryndaýdy bastap ta ketti. Anyǵyraq aıtsaq, departamenttiń jáne onyń baǵynysyndaǵy bólimder men basqarmalardyń joǵary áskerı daıyndyqtaryn qadaǵalaýda.
Jıyrma jeti jyldy eńsergen elimizdiń qorǵanys salasy osy jyldar ishinde nebir belesten ótip, nebir qamaldardy aldy. Qanatyn qataıtty, ósti, órkendedi, osylaısha búgingi deńgeıine jetti. Endeshe Elbasy salyp bergen sara jolmen, Prezıdentimizdiń zaman talabyna saı zaıyrly memleket qurýǵa degen betburysyn qorǵanys júıemizdi bekem ustaı otyryp qoldaý – bizdiń birden-bir mindetimiz dep sanaımyn.
Erlan JABYQBAEV,
polkovnık, Jambyl oblystyq qorǵanys isteri jónindegi departament bastyǵy
