Is-sharaǵa mádenıet jáne óner qaıratkerleri, dıplomatııalyq korpýs pen etnomádenı ortalyqtardyń ókilderi, Nur Sultan qalasyndaǵy ýnıversıtetter men kolledjderdiń oqytýshylary men stýdentteri qatysty.
– Qadirli kórme qonaqtary! Qurmetti jas dostar! Áýeli barshańyzdy kele jatqan memlekettik mereke – Qazaqstan Respýblıkasynyń Tuńǵysh Prezıdenti kúnimen shyn júrekten quttyqtaımyn! Osy aıtýly dataǵa baılanysty Elbasy kitaphanasy is-sharalar onkúndigin ázirledi. Búgingi is-shara onkúndiktiń tusaýkeseri bolyp otyr. Elbasymyzdyń «daryndy jastar – elimizdiń bolashaǵy jáne áleýeti» deýi kezdeısoq emes. Bul baıqaýǵa kóptegen jas sýretshiler men tanymal óner maıtalmandary úlken eńbek jasady. Ásirese, jastardyń yqylasy óte joǵary bolǵanyna qýanyshtymyn. Jeńimpaz atanǵan óner ıeleriniń shyǵarmashylyq jumystary aldaǵy ýaqytta Elbasy kitaphanasynyń úlken galereıalary men kórme zaldarynan laıyqty oryn alady dep úmittenemin. Osy sátti paıdalana otyryp, Qazaqstannyń beıneleý ónerine ózindik úles qosyp júrgen sýretshiler men qolóner sheberleri qaýymyna shyǵarmashylyq tabystar tileımin! – dedi kórmeni ashqan Elbasy kitaphanasynyń dırektory Ámirhan Rahymjanov.
Jastar jylyna arnalǵan kórme – ústimizdegi jyldyń aqpan aıynda Elbasy kitaphanasy men Nur-sultan qalalyq Sýretshiler odaǵynyń beıneleý óneri maıtalmandary men sándik-qoldanbaly óner sheberleriniń arasynda jarııalaǵan respýblıkalyq baıqaýynyń II kezeń qorytyndysy. Kórkem óner baıqaýy «Uly dalanyń jeti qyry» maqalasyndaǵy Elbasynyń oıyn jalǵastyrady. Onyń aıasynda tarıhqa izin qaldyrǵan ultymyzdyń dara tulǵalary beınelengen beıneleý óneri men qazirgi óner salasynyń biregeı galereıasy qurylmaq.
– Elbasy kitaphanasymen birge jastar arasynda uıymdastyrǵan baıqaýdyń nátıjelerimen tanysýǵa ýaqyt taýyp kelgen ónersúıer qaýymǵa rıza bolyp otyrmyn. Tuńǵysh Prezıdent úndeýiniń arqasynda beıneleý óneriniń ókilderi oılaryn júzege asyrý múmkindigin aldy. Mazmundy ekspozısııalar men jádigerlerge baı mýzeıdiń kórmesine qoıylǵan aldaryńyzdaǵy jumystar Elbasy kitaphanasy qorynyń saqtaýyna qabyldanbaq. Munyń bárin jastarǵa degen Nursultan Ábishulynyń qamqorlyǵy dep bilemiz. Osy tusta áriptesimizge aınalǵan kitaphananyń ujymyna, Tuńǵysh Prezıdentke alǵysymyz sheksiz, - dedi Nur-Sultan qalalyq Sýretshiler odaǵynyń tóraǵasy О́miráli Ysmaıylov.
Is-shara barysynda II baıqaý kezeńiniń jeńimpazdary marapattaldy. Bas júldeni qanjyǵasyna baılaǵan Zámzegúl Oralbaeva bizben pikir bólisti:
– Sheteldik baıqaýlarǵa jıi qatysyp júrgenimmen, elimizde uıymdastyrylǵan saıysqa alǵash qatysyp, júldeli orynǵa ıe bolyp otyrmyn. Kóńilime ystyq sezim uıalatqan júldeniń men úshin mańyzy zor. Byltyr bastaǵan pannony kıizden jasaǵan bolatynmyn. Onyń top jaryp shyǵatynyn múldem kútpegen edim. Qazylar alqasy tabıǵat sulýlyǵyna degen mahabbatymdy sezinse kerek, jumysymnyń úzdik dep moıyndalǵanyn estip, qýanyshymdy qoınyma syıǵyza almaı jatyrmyn. Men usynǵan tekemettiń betinen erekshe aǵashtyń beınesin baıqaýǵa bolady. Kúndelikti ómirde tamyry tereń emenge rýhy myqty adamdardy teńep jatatynymyz beker emes. Kez kelgen aǵash adamnyń ómirin, áýletiniń shejiresi men babalar ósıetimen tyǵyz baılanysyn beıneleıdi. Mundaı saıystardyń arqasynda qarapaıym jurt pen sheteldik qonaqtar qazaq halqynyń ulttyq ónerimen jaqynyraq tanysa alady. Sol sebepti uıymdastyrýshylarǵa alǵysymdy aıtamyn, - dedi ol.
I oryndardy «Keskindeme» nomınasııasynyń jeńimpazy Renat Elýbaev, «Grafıka» nomınasııasynyń jeńimpazy О́mirbek Tileýlıev, «Sándik-qoldanbaly óner» nomınasııasynyń jeńimpazy Marash Kenıeva, «Músin» nomınasııasynyń jeńimpazy Tileýjan Batanov ıelendi. II oryndy «Sándik-qoldanbaly óner» jáne «Keskindeme» nomınasııalarynyń jeńimpazdary, Darııa Qalymova men Senbiǵalı Smaǵulov aldy. III oryndy ıelengen Almas Syrǵabaev «Grafıka» nomınasııasyn jeńse, Nına Tereshenko men Ismaıl Achılov «Keskindeme» nomınasııasynyń jeńimpazy atandy.
Jastar jylyna arnalǵan baıqaý jańadan bastaýshylar men kásibı sýretshiler, músinshiler, sándik-qoldanbaly óner sheberleri jáne Qazaqstannyń ónertanýshylary arasynda 18-35 jáne 36 jastan joǵary eki jas sanaty boıynsha ótti. Baıqaýdyń birinshi kezeńiniń qorytyndysy boıynsha osy jyldyń shilde aıynda qatysýshylar jumystarynyń kórmesi jáne marapattaý rásimi ótken.
