Trenıngterdi ótkizýge Reseı, Qytaı jáne Qazaqstannyń úzdik bıznes-trenerleri men QHR ǵylymı qaýymdastyǵynyń ókilderi arnaıy shaqyrylǵan bolatyn.
Qonaqúı bıznesi ókilderine arnalǵan úshkúndik sheberlik sabaqtary kezinde qonaqúı kásiporyndarynyń qarjylyq kórsetkishterin jaqsartý, daýly jaǵdaılardy basqarý, jáne tıimdi kommýnıkasııalardy ornatýdy úıretti. Praktıkalyq daǵdylardy meńgerý kezinde jaǵdaıattyq keısterdi talqylaý, róldik oıyndar oınatý jáne beınejazbalardyń saraptamasy qoldanyldy. Sondaı-aq otandyq týr operatorlar Qazaqstanǵa týrısterdi tartýdaǵy marketıngtik quraldardy, jáne týrıstermen til tabysýdyń joldaryn meńgerdi.
Reseılik bıznes-koých Mıhaıl Elızarovtyń pikirinshe, mundaı sharalardyń týrıstik salada jumys isteıtinder úshin tıgizer paıdasy kóp.
«Tegin trenıngter ótkizý arqyly týr bızneske qamqorlyq tanytqan uıymdastyrýshylarǵa jáne Qazaqstan Úkimetine basymdy ıemin. Aldaǵy ýaqytta da mundaı sharalardyń aýqymyn keńeıtip, jıi uıymdastyrǵan abzal,» - deıdi Máskeýlik basqarý kolledjiniń lektory.
Qaraǵandylyq týr operator Pavel Makeevtiń pikirinshe, mundaı trenıngterdi kelesi jyly mindetti túrde týrıstik basym baǵyttardyń TOP-10 aımaǵynda ótkizý qajet.
«Atalǵan óńirlerdegi qonaqúı bıznesin basqarýǵa jiti kóńil bóliný kerek. Sondyqtan, kadrlardyń daıarlyǵyna nazar aýdarylsa, nur ústine nur bolar edi. Oǵan qosa, osyndaı pikir almasý alańdary bolashaq áriptestermen baılanys ornatýǵa mol septigin tıgizedi», deıdi qaraǵandylyq týr operator.
Budan bólek, trenıngke qatysýshylar týrıstik naryqtyń, onyń ishinde Reseı jáne Qytaıdyń naryǵyn tereńirek zertteýge múmkindik aldy. Sebebi, Qazaqstan atalǵan elderdiń týrıstik naryǵyna shyǵýdy kózdeıdi.
Úsh kúnge sozylǵan sharanyń qorytyndysy boıynsha, barlyq qatysýshylarǵa sertıfıkattar tabystaldy.
