«Qazaqstan men Fransııa ‒ strategııalyq seriktester. Biz senimdi yntymaqtastyqtyń berik irgetasyn qalaı aldyq. Bul eki tarap úshin de aıtarlyqtaı ekonomıkalyq, saıası jáne mádenı dıvıdendter ákeledi», — dedi A. Mamın.
Bıyl 9 aıda Qazaqstan men Fransııa arasyndaǵy taýar aınalymy Eýropalyq Odaqtyń basqa elderindegi kórsetkishterden arta otyryp, 6%-dan astam ósti jáne $3,4 mlrd qurady. Osy jyldyń birinshi jartyjyldyǵyndaǵy QR ekonomıkasyna tikeleı fransýz ınvestısııalarynyń aǵymy 24%-dan astamǵa, $537 mln deıin ulǵaıdy.
Úkimet basshysy kóptegen ınvestısııalyq jobanyń belsendi iske asyrylý satysynda turǵanyn atap ótti. Qazaqstanda fransýz kapıtalynyń qatysýymen túrli salalarda 230-ǵa jýyq kásiporyn jumys isteıdi, olardyń ishinde Total, Orano, Alstom jáne basqa da iri transulttyq korporasııalar bar. Táýelsizdik jyldary Fransııa kompanııalary Qazaqstanǵa $16,4 mlrd astam ınvestısııa saldy.
Úkimet basshysy men fransýz kompanııalarynyń ókilderi eki eldiń bıznes qurylymdary arasyndaǵy ózara tıimdi yntymaqtastyqty nyǵaıtý, sondaı-aq, energetıka, sý sharýashylyǵy jáne turǵyn úı-kommýnaldyq ınfraqurylymyn jańǵyrtý, sıfrlyq densaýlyq saqtaý, bıometrııalyq júıeler, avtomobıl qurastyrý, transformator óndirisi, ǵaryshtyq jerserikterdi qurastyrý jáne t.b. salalardaǵy birlesken jobalardy iske asyrý máselelerin talqylady.
Kezdesýge Premer-Mınıstrdiń birinshi orynbasary ‒ Qarjy mınıstri Á. Smaıylov, Indýstrııa jáne ınfraqurylymdyq damý mınıstri B. Atamqulov, Ulttyq ekonomıka mınıstri R. Dálenov, Ekologııa, geologııa jáne tabıǵı resýrstar mınıstri M. Myrzaǵalıev, Densaýlyq saqtaý mınıstri E. Birtanov, Syrtqy ister, Energetıka, Sıfrlyq damý, ınnovasııalar jáne aeroǵarysh ónerkásibi, Saýda jáne ıntegrasııa vıse-mınıstrleri, ulttyq kompanııalardyń basshylyǵy jáne t. b. qatysty.
Fransýz delegasııasy quramynda Total, Orano, Alstom, Airbus, Vicat, Air Liquide, Idemia, Renault CIS & LADA Export, Veolia, Bouygues Travaux Publics, Catering International Services, DV Conseil, Lazard, Sanofi, TechnipFMC, TECOFI S.A.S. kompanııalary boldy.
Fransııa kásiporyndarynyń qozǵalysy (MEDEF) ‒ túrli qyzmet salasyndaǵy 800 myń kompanııany biriktiretin eldiń bıznes qaýymdastyqtarynyń iri uıymy.
