Baǵzy zamannan qalǵan babalar tili–tasqa qashalyp qalǵan tańbalarmen bezendirilgen kabınettiń mazmuny erekshe.
Bıylǵy jyly Mýzyka mektebiniń 3 jobasy «Rýhanı jańǵyrý» baǵdarlamasyn júzege asyrý boıynsha oblystyq tizimge engen bolatyn.
-Oblysymyzda alǵash ret folklorlyq ansamblderiniń arasynda I Aımaqtyq «Uly dala áýeni» baıqaýy ótkizildi. Ulttyq dombyra kúnine oraı bir aı boıy dombyra úırenýge nıetti árbir adamdy mýzyka mektebi tegin oqytty. Merekelik konsert kúni bir ýaqytta 300 dombyrashy kúı shertti,-deıdi mektep dırektory Medǵat Manap.
Al, «Dala folklory men mýzykasyna 1000 jyl» jobasy aıasynda folklor kabınetiniń qoryna sırek kezdesetin foto-vıdeo materıaldar jınaqtalady.
Kabınette qazaq folkloryn jınaýǵa úles qosqan Máshhúr Júsipten bastap, A.Zataevıch, Q.Sátbaev, A.Jubanov, B.Sarybaev, Z.Qospaqov, Q.Júzbasov sııaqty ǵalymdar jaıly derekter bar.
Árbir ǵalym qazaq folkloryn jınaýda ózindik eńbek sińirgen.
Mysaly, A.Zataevıch «Qazaq halqynyń 1000 áni», «Qazaqtyń 500 án-kúıi» kitaptarymen ulttyq muramyzdy álemge tanytty.
Kabınette atalǵan ǵalymdardyń eńbekteri jınaqtalyp, kelýshi qaýymǵa usynylǵan. Oqýshylar olardyń ómirbaıanymen ǵana emes eńbekterimen de tanysady.
Tórgi qabyrǵaǵa ilingen syrǵa toly kartına kabınetke erekshe kórik beredi. 3000 jyldyq tarıhy bar Túrkııanyń Anadoly eldi mekeninen tabylǵan qoıtasta adam, dombyra jáne sol aspaptyń kıesinde qus beınelengen.
Ál-Farabıdiń 1150 jyldyǵy men Abaıdyń 175 jyldyq mereıtoılary qarsańynda «Rýhanı jańǵyrý» kabınetinde Ál-Farabı men Abaıdyń taǵylymy jóninde aqparat usynyldy.
Ulylar úndestigin ǵylymı turǵyda zerttegen Aqjan Mashanıdyń eńbekterin ala otyryp Ál-Farabıdyń dúnıe tanymy men Abaı áleminiń úılesimi kórsetildi.
-Sonymen qatar «Ál-Farabıdyń maqamy» negizinde mýzykanyń qudyreti, onyń ulylyǵy men tabıǵatpen baılanysy zertteldi. Aqjan Mashanıdyń «Ál-Farabıdi oıshyl deımiz, biraq ol mýzykant. Abaıdy aqyn deımiz, biraq ol oıshyl» degen sózine súıene otyryp babanyń mýzyka áleminde alatyn ornyn aıshyqtadyq,-deıdi mektep dırektory Medǵat Manap.
Ekibastuz
