30 qarasha kúni Nur-Sultan qalasynda Qazaqstannyń Ulttyq Olımpıada komıteti jyldy qorytyndylap, «Altyn Samgay-2019» Ulttyq sport syılyǵyn tabystady.
Qarasha aıynyń 15-i men 30-y aralyǵynda awards.olympic.kz saıtynda ártúrli atalymdar boıynsha úmitkerlerge daýys berý júrgizildi.
Eki apta ishinde elimizdiń sportsúıer qaýymymen 820 myń daýys berilip, saraptaýdan ótti.
Daýys berý nátıjesinde, 2019 jylǵy «Úzdik jas sportshy» bolyp Chılıde ótken jastar arasyndaǵy WKF nusqasy boıynsha karateden álem birinshiliginiń júldegeri - Ábilmansur Batyrǵalı tanyldy.
Atyraýlyq sportshy óz atalymynda 5633 daýys jınap, Jambyl oblysynyń týmasy, dzıýdoshy Nurqanat Serikbaevty basyp ozdy.
Sportshynyń ata-anasy Ábilmansurǵa qoldaý bildirgen jankúıerleri men onyń jetistikterin moıyndaǵan barshaǵa alǵys bildirdi.
- О́tken jyly Ábilmansurymyz Atyraý oblysynyń úzdik jas sportshysy atanyp edi, bıyl ony Qazaqstannyń Úzdik jas sportshysy dep tanyp otyr. Boıymyzdy qýanysh pen maqtanysh kernep barady. Balamyzǵa daýys berip, oǵan qoldaý bildirgen barshaǵa, odan bólek «Qaısar» sport klýbynyń jattyqtyrýshylar quramyna erekshe alǵys bildiremiz, - deıdi Ábilmansur Batyrǵalıdyń ákesi.
Esterińizge sala keteıik, «Qaısar» sport klýbynyń shákirti Ábilmansur Batyrǵalı byltyr ótken jastar arasyndaǵy Olımpıada oıyndarynyń qola júldegeri atanǵan edi. Osy jetistik onyń jigerin janyp, jańa belesterdi baǵyndyrýyna úlken ynta berdi.
- Keler jyly «Qaısar» sport klýbynyń qurylǵanyna 30 jyl tolady. Alǵashynda «Geologtaǵy» sportzalda kishkentaı ǵana seksııa bolyp bastap, búginde Atyraý qalasynyń jas órenderin ǵana emes, oblystyń shalǵaı aýyldaryndaǵy da jas sportshylardy daıyndaıtyn úlken sport klýbyna aınaldyq. Bizdiń klýb Olımpıada júldegerin, karate men mýaı-taıdan álem chempıondaryn, onyń ishinde Ábilmansur Batyrǵalıdy da tárbıelep shyǵarǵanyn maqtan tutamyn. Qaı-qaı shákirtimiz de Qazaqstannyń kók baıraǵyn álemniń qaı sport dodasynda da abyroımen alyp júrgenin maqtanysh tutamyn, - deıdi sporttyq jáne dástúrli karate men mýaı-taı oblystyq Federasııalarynyń vıse-prezıdenti, «Qaısar» sport klýbynyń jetekshisi Aıbat Rahman.
Búginde «Qaısar» sport klýbynyń jumysy Atyraý oblystyq ákimdiginiń qoldaýyna ıe. Jergilikti atqarýshy bıliktiń qarjylyq qoldaýynyń arqasynda sport klýby elimiz ben alys-jaqyn shetelderdiń sheberlerin shaqyryp, qalalyq, oblystyq, qala berdi respýblıkalyq deńgeıdegi semınarlar men jarystar ótkizip keledi. Jergilikti bıýdjetten sportshylardyń halyqaralyq týrnırler men jarystarǵa barýy da qarjylandyrylady. Osydan birneshe jyl buryn «Qaısar» klýby Nursaıa yqsham aýdanynda sport zalǵa arnalǵan jańa ǵımaratqa qol jetkizgen edi.
