B.Beknazarov quttyqtaý sózinde Qazaqstan ótken jyldarda zań shyǵarýdy sapalyq turǵydaǵy jańa deńgeıge shyǵarǵanyn jetkizdi. Sonymen qatar zań shyǵarý prosesi únemi jetildirýdi talap etedi.
«Ol úshin Úkimettiń zań jobalaý qyzmetin josparlaýdy jetildirý, zań jobalary men olardyń tujyrymdamalaryna ǵylymı saraptama uıymdastyrý ádisterin túbegeıli ózgertý, qazaq jáne orys tilderinde birdeı túpnusqany qamtamasyz etý boıynsha tıimdi sharalar qabyldaý, memlekettik organdardaǵy zań jobalaryn ázirleýge jaýap beretin naqty adamdarynyń jaýapkershiligin kúsheıtý qajet» dep atap ótti Senat Tóraǵasynyń orynbasary.
Ádilet mınıstriniń mindetin atqarýshy Natalıa Pan «Zań shyǵarý prosesin odan ári jetildirý» taqyrybyndaǵy parlamenttik tyńdaýdyń qorytyndysy týraly aıtty. Ol qabyldanatyn jáne qabyldanǵan zańdardyń turaqtylyǵy men sapasyn qamtamasyz etý úshin ádilet mınıstrligi jekelegen memlekettik organdarǵa da, jalpy zań shyǵarý júıesine de yqpal etýdiń barlyq yqtımal tetikterin qoldanyp kele jatqanyn aıtty.
Bul taqyryp boıynsha senator Vladımır Volkov parlamenttik tyńdaýdyń qorytyndysy boıynsha 17 pýnktten turatyn usynystar daıyndalǵanyn habarlady. Ádilet mınıstrligi tarmaqtardyń bir bóligin oryndady. Qalǵandary uıymdastyrý turǵysynda jáne keshendi sheshimdi talap etedi. Ol «Qazaqstan Respýblıkasynyń keıbir zańnamalyq aktilerine norma shyǵarýdy jetildirý máseleleri boıynsha ózgerister men tolyqtyrýlar engizý týraly» zań qabyldanǵannan keıin múmkin bolady.
Kezdesýge qatysýshylardyń pikirinshe, Keńestiń jumysy zań shyǵarý prosesin jetildirý jónindegi jumysty kúsheıtýge múmkindik beredi. Degenmen, tıisti memlekettik organdar men qoǵamdyq uıymdar arasyndaǵy ózara is-qımyldy kúsheıtýdiń mańyzy zor ekeni aıtyldy.
Otyrysta Keńes tóraǵasynyń orynbasary men hatshysy saılandy. Keńes tóraǵasynyń orynbasary Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Vladımır Volkov, hatshysy Parlament Senaty Apparaty basshysynyń orynbasary Marat Ýaqpaev boldy.
Parlament Senaty janyndaǵy Zań shyǵarý prosesin jetildirý jónindegi keńes bıylǵy jyldyń 1 shildesinde zań shyǵarý qyzmetiniń tıimdiligin arttyrý maqsatynda qurylǵan bolatyn. Onyń quramyna Senat depýtattary, memlekettik organdar men qoǵamdyq birlestikterdiń ókilderi, belgili quqyqtanýshy ǵalymdar kirdi.
