Qazaq úshin Jeltoqsan jyldyń basy...

Qazaqstan • 10 Jeltoqsan, 2019

Qazaq úshin Jeltoqsan jyldyń basy...

70 ret kórsetildi

Burnaǵy kúni Qyzyljar aspanynyń astyn dúbirletip, jergilikti on segiz aqyn qatysqan, Táýelsizdik kúnine arnalǵan alaman aıtys ótti. «Qyzyrly Qyzyljar – qut besik» dep atalǵan, tek qana teriskeıdiń aqyndary qatystyrylǵan mundaı aıtys óńirde tuńǵysh ret ótkizilip otyr eken.

Jaqsybaı SAMRAT

Uly jazýshymyz M.Áýezov aıtqandaı osy kúni oblystyń eń úlken sahnasynan «jyl kelgendeı jańalyq» sezindik. Osydan biraz ǵana buryn «Soltústikte aıtysatyn aqyn joq, bul óner mesheý qaldy» dep júrgen edik. Endi on segiz aqynnyń sahna tórine kóterilgeni jáne bári de «ótkirdiń júzi, kesteniń bizi órnegin sala almaıtyn» sheber tilmen, sheshen sózben kórermenderdi tánti etkeni bir ǵanıbet boldy. Osynsha aqyndy taýyp, aınalasy birneshe jyldyń ishinde ǵana aqyndar mektebiniń negizin qalaǵan Jarqyn Juparhan inimizge qalaı alǵys aıtsaq ta jarasatyn sııaqty.

Alǵashqy jupqa Qyzyljar aýdanynyń ókili Amanjol Zaǵypar men Esil aýdanynyń ókili Jantileý Rahymov shyqty. Ádemi tirkester, ótkir oılar bulardyń aıtysynda kóp bolmasa da eles berip jatty. «Paryzymdy ótep júrgen maǵan, aryzyńdy sen aıtyp qoımaısyń» degen uıqastar sátti shyǵyp jatty. Árıne, sheberlik pe, shabyt pa bul ekýine sál jetińkiremeı turdy. Ekinshi jupqa Esil aýdanynyń taǵy bir aqyny Abzal Jumabek pen Shal aqyn aýdanynyń aqyny Shyńǵyshan Ǵabdýllın shyqty. Osy aıtysta Shyńǵyshannyń qyzyljarlyqtarǵa qarap, «Eriktiń ornyn basyp 18 aqyn shyqty, qabyl bolǵan shyǵar tilek, duǵalaryń» degen sózderi oryndy aıtyldy. Shynynda, bir kezde barlyq qazaqqa tanymal bolǵan Erik Asqarovtan keıin bul ólke, joǵaryda aıtqanymyzdaı, qazaqtyń tól óneri aıtysta kenjelep qalǵan edi. Aıtqandaı, qazirgi Jarqyn Juparhan basqaryp júrgen «Aqyndar mektebi» sol Erik Asqarovtyń atynda.

Úshinshi jupqa Aıyrtaý aýdanynyń ókili Muhammed Qońqaev pen Mamlıýt aýdanynyń atynan Nurgúl Oqasheva shyqty. Ekeýine de on upaıdan berilgen bul aıtysta ótkir til, taýyp aıtylǵan sheshen sózder, ádemi ázilder, áleýmettik máseleler – bári de aıtyldy. Ásirese, Nurgúl aıtqan - Qyzyljarda áli kúnge Telman, Frýnze sııaqty halyqty qynadaı qyrǵan qyzyl kámeserlerdiń atynda kóshe bolyp, áli kúnge qazaq úshin shybyn jandaryn shúberekke túıip kúresken Alash arystarynyń atynda bir de kóshe aty joq degen sózder dóp aıtylǵan syndar ekenine eshkim daý aıta almas.

Barlyq juptyń aıtysyn baǵalap, saralap shyǵý múmkin emes, sondyqtan tek sensasııalyq jup bolǵan ákeli-balaly О́zbek Tastanbekov pen Sanjar О́zbekulynyń aıtysy jurttyń ezýin jıdyrmaǵanyn aıta keteıik. Ekeýin aıtysýǵa jerebe qosqan eken. Aıtysty aldymen bastap ketken balasyn ákesi «áke otyryp uly sóılegennen bez» degen emes pe dep bir-aq sózben ustaǵan edi, biraq oǵan qaramaı, ýaqyt bolǵan soń ekeýi ázilmen sharpysa berdi. Sol sııaqty qyzyljarlyq Serik О́tepbergenov pen aıtysqan Ýálıhanov aýdanynyń ókili Amangeldi Oqastyń «О́zge jurtqa jeltoqsan jyldyń sońy bolsa, Qazaq úshin ol jyl basy» degeni tapqyrlyqpen aıtylǵany tánti etti.

Qoryta aıtqanda, aıtystyń bas báıgesi – 300 myń teńgeni Muhammed Qońqaev, birinshi oryndy – Jumabek Rahymov, ekinshi oryndy – Nurgúl Oqasheva, úshinshi oryndy dırıjer bolyp istep, eline óner taratyp júrgen taǵy bir jas Qaıyrly Ǵafýrov aldy. Aıtysqa shyqqan aqyndardyń bárine 50 myń teńgeden, al kózge túskenderge Qyzyljar aspanynyń juldyzdary bolǵan K.Salyqov, Sh.Sháımerdenov, M.Jumabaev, E.Asqarov atyndaǵy 80 myń teńgelik syılyqtar berildi.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz