Jyldyń eń mańyzdy sporttyq sharasynyń biri bolyp tanylatyn ol bıyl tórtinshi ret ótkizilip otyr. Ony Ulttyq Olımpıadalyq komıtettiń prezıdenti Tımýr Qulybaev uıymdastyryp, júlde qoryn - 165 mln teńge shamasynda taǵaıyndaǵan.
Búginge deıin atalǵan sport túrleriniń birnesheýi boıynsha fınaldyq jarystar aıaqtalyp, jeńimpazdar belgili boldy. Sonyń ishinde Túrkistan oblysynyń komandasy boksta jeńimpaz bolsa, Shymkent qalasynyń balýandary grek-rım kúresinde úzdik shyqty. Almaty qalasynyń komandasy karate men taekvondoda eshkimdi shaq keltirmedi.
Al keshe, fınalǵa shyqqan Soltústik Qazaqstannyń «Qyzyljar arlandary» komandasy qazaq kúresinde jurttyń bárin jeńip, chempıon atandy. Bizdiń óńirdiń balýandary Qaraǵandynyń «ZAK KAR», Almaty qalasynyń «Qazaq kuresi» jáne «AOSK» (Armııa ortalyq sport klýby) sport klýbtarymen baq synady.
Oblys namysyn qorǵaǵan soltústikqazaqstandyqtar jartylaı kezeńde Qaraǵandy oblysynyń «ZAK KAR» sport klýbymen kezdesip, 4:3 esebimen jeńiske jetti. Fınalǵa shyǵý joldamasyn ol «AOSK» sport klýbymen sarapqa salyp, jeńiske jetti.
Jerlesterimiz fınalda almatylyq «Qazaq kuresi» klýbymen kezdesip, 1 jáne 2 oryndy sarapqa saldy. Qarsylastarymyz aldaǵy álem chempıonatyna qatysýyna baılanysty eki salmaqta balýan shyǵara almady. Sonyń nátıjesinde kezdesýler 4:0 esebimen aıaqtaldy.
Sóıtip «Qyzyljar arlandary» qazaq kúresi boıynsha tuńǵysh ret respýblıka chempıony atanyp, 10 mln. teńgelik júldeni qanjyǵalaryna baılady.
