Ekibastuz qalasynda «Jaz-2013» qalalyq baǵdarlamasy aıasynda maýsym aıynda «Shirkin, life - 2013» etnojobasy bastaý alǵan edi. Jobaǵa 1 500 balalar men jasóspirimder, sondaı-aq mektep muǵalimderi, «Dostyq úıiniń» etnomádenı birlestikteri, qalalyq máslıhat depýtattary, mesenattar, ata-analar qatysty.
Jobany iske asyrý baǵdarlamasy boıynsha qyzyqty, tartymdy is-sharalar josparlanyp ótkizilse, negizgi is-shara «Qaınar» BBK alańynda ornalasqan jeti etnomádenı birlestikten quralǵan «Nurly aýyl» etnoaýylynyń jumysy boldy. Oǵan koreı, ýkraın, orys, qazaq, tatar, cheshen jáne nemis etnostarynyń ókilderi qatysty.
Etnoaýyldyń ashylýyna 600-den astam balalar men jasóspirimder keldi. Olar etnostardyń turmysymen jáne salt-dástúrimen tanysyp, ulttyq etnomádenı birlestikterdiń ókilderimen «Eń úzdik fotosıýjet» saıysyna qatysty. Kúnniń sońynda balalar tilekter qaǵazdaryna ózderiniń alǵan áserlerin jazdy.
Kelesi kezdesý «Saıahat» oıyny formasy túrinde ótkizildi. Barlyq qatysýshylar túrli etnostardyń ulttyq oıyndarymen tanysty. Úshinshi kún «Dámdi kún» taqyrybynda ótti. Barlyq etnomádenı birlestikterdiń ókilderi ulttyq taǵamdaryn ázirlep, balalarǵa dám tatqyzdy. Tórtinshi kún «Ertegiler áleminde» dep ataldy. Navıgator baǵdary boıynsha balalar aldyn ala daıyndalǵan túrli tapsyrmalardy oryndady. Osy ýaqytta alańda konsert júrdi. Jobaǵa Ekibastuz óńiriniń aýyl balalary qatysty.
Joba aıasynda Baıet aýylynda realıtı-shoý boldy. Qala balalary aýyl balalarymen birlesip, kıiz úı qurdy, maı shaıqap, baýyrsaq pisirdi, samaýyr qyzdyryp, traktormen júrýdi úırendi.
Apta boıy «Ekibastuz» balalar qory balalarǵa tátti syılyqtar berse, jobanyń sońǵy kúninde belsendi toptar men qatysýshylarǵa syılyqtar úlestirdi.
Balalardyń jobadan alǵan áserlerin sózben jetkizý múmkin emes. Jobanyń qatysýshylary men qonaqtary ózderiniń lebizderin qonaq kitabynda bildire aldy.
«Shirkin, life-2013» jobasynyń ereksheligi oǵan Ekibastuz qalasy turǵyndarymen qatar, shetelden kelgen qonaqtardyń qatysýy boldy. Ekibastuzdyń mektep oqýshylary úshin bul joba eń jarqyn jazǵy demalystyń úlgisine aınaldy.
«Egemen-aqparat».
