Marapattalǵandar arasynda ǵylym men mádenıetti, ekonomıka men qoǵamdyq kelisimdi, óner men sportty damytýǵa úles qosqan kóptegen muǵalim, medısına qyzmetkerleri, qurylysshylar, qoǵamdyq kólik júrgizýshileri bar. Oldardyń barlyǵy megapolısti damytýǵa aıtarlyqtaı úles qosqan.
«Men úshin kıeli mıssııany oryndaý ári kórnekti memleket jáne qoǵam qaıratkerleriniń, bilim, mádenıet, sport, densaýlyq saqtaý úzdikteriniń, memlekettik qyzmetkerlerdiń, áleýmettik qorǵaý qyzmetkerleriniń, azamattyq qoǵam ókilderiniń, energetıka, qarjy, qurylys, týrızm jáne bıznes salasy qyzmetkerleriniń sińirgen eńbekterin atap ótý - úlken qurmet. Olardyń árqaısysy ózderiniń kúndelikti eńbekterimen qalanyń damýyna úles qosýda, memleketimizdiń táýelsizdigin nyǵaıtýda», - dep atap ótti Almaty ákimi Baqytjan Saǵyntaev.
«Parasat» ordenimen eńbek ardageri, «Ǵylym ordasynyń» ǵylymı qyzmetkeri Ǵaınıken Bıbatyrova; eńbek ardageri, Qazaq SSR-iniń halyq artısi Lakı Kesoglý; Qazaqstan Jazýshylar odaǵy tóraǵasynyń orynbasary Mereke Qulkenov; eńbek ardageri, Qazaqstan Prezıdenti janyndaǵy Qazaqstannyń strategııalyq zertteýler ınstıtýtynyń ǵylymı qyzmetkeri Klara Hafızova marapattaldy.
«Qurmet» ordenimen marapattalǵandardyń arasynda «Sentras Kapıtal» holdıngtik kompanııa» Dırektorlar keńesiniń tóraǵasy Eldar Ábdirazaqov; Q. I. Sátbaev atyndaǵy Qazaq ulttyq zertteý-tehnıkalyq ýnıversıtetiniń professor-zertteýshisi Zınesh Ábisheva; «Mıloserdıe» Erikti qoǵam» qaıyrymdylyq qorynyń dırektory, bala quqyǵy jónindegi ýákil Arýjan Saın; rejısser Aqan Sataev; Almaty qalasynyń bas ımamy Erkinbek Shoqaı bar.
III dárejeli «Eńbek Dańqy» ordenimen «Almaty kópir konstrýksııalary zaýyty» JShS №3 sehynyń armatýrshıgi Vasılıı Gorbýn; «Almatyelektrotrans» JShS trolleıbýs júrgizýshisi Alǵashbaı Jarmedetov; «Almatymetroqurylys» AQ taý departamentiniń úńgýshisi Erejep Jaýkenov; «Alataý Jaryq Kompanııasy» AQ jelilerdi bólý Basqarmasynyń aǵa sheberi Almas Omarov; «Metropolıten» MQK elektropoezynyń mashınısi Andreı Sekırkın; eńbek ardageri, «Almatyelektrotrans» JShS trolleıbýs júrgizýshisi Anatolıı Cherenov marapattaldy.
Bulardan ózge, birqatar almatylyqtar «Eren eńbegi úshin» jáne «Shapaǵat» medaldarymen, «Qazaqstannyń eńbek sińirgen qaıratkeri» qurmetti ataǵymen, Qazaqstan Respýblıkasynyń Qurmet gramotasymen, Qazaqstan Respýblıkasy Prezıdentiniń Alǵys hatymen atalyp ótildi.
Sonymen qatar, Almaty ákimi Baqytjan Saǵyntaev bekitken qalany damytýǵa qosqan úlesi úshin beriletin «Eńbegi úshin» tósbelgisimen qalanyń birqatar qoǵam qaıratkerleri marapattaldy. Olardyń arasynda Qazaqstannyń múgedekter uıymy Odaǵynyń tóraǵasy Álı Amanbaev; №2 qalalyq bosandyrý úıiniń bosandyrý bóliminiń meńgerýshisi Tamara Shakırova jáne basqalary bar.
Aıta keterligi, bir top qalalyqtar «Qazaqstan máslıhattaryna 25 jyl» merekelik medalimen, Nur Otan partııasynyń «Belsendi qyzmeti úshin» tósbelgisimen marapattaldy.
Tús aýa resmı shara Respýblıka saraıynda Táýelsizdik qurmetine ótken merekelik konsertpen jalǵasty. Qala turǵyndary men qonaqtaryn aıtýly meırammen quttyqtaǵan qala ákimi Baqytjan Saǵyntaev Táýelsizdik jyldaryndaǵy qol jetken jetistikterdi jipke tizip, respýblıka ekonomıkasynyń negizgi draıveri – ońtústik megapolıstiń damý kórsetkishterine toqtaldy. Atap aıtqanda, Táýelsizdiktiń alǵashqy jyldarynda Almatynyń Jalpy Ishki О́nimdegi úlesi 10 paıyz ǵana bolsa, búginde bul kórsetkish eki esege artty. Qazir Almaty el ekonomıkasynyń besten bir bóligin quraıdy.
Konsertke Baqytjan Saǵyntaev bastaǵan qala aktıvi qatysty.
Qala ákimi Baqytjan Saǵyntaev almatylyqtardy táýelsizdik kúnimen quttyqtady.
Memlekettik syılyqtyń laýreaty, ánshi Maıra Muhamedqyzy, ánshi Zarına Altynbekova, Erke Esmahan ánnen shashý shashty.
ALMATY
.
