«Daýlet» sport kesheninde ótetin baıraqty báseke barysynda erler men áıelder arasynda 12 salmaq dárejesinde júldeler sarapqa salynbaq. Álem birinshiliginiń saltanatty ashylýy joǵaryda atalǵan sport keshende 20-shy jeltoqsan kúni saǵat 16.00-ge josparlanǵan.
Atalǵan Álem chempıonaty Birikken Kúres Áleminiń (United World Wrestling) 2019 jylǵa arnalǵan resmı kúntizbesine engen jáne jarystar tolyqtaı UWW resmı ókilderi men halyqaralyq dárejedegi tóreshileriniń qatysýymen ótkizilmek. Al el jankúıerleri «QAZSPORT» telearnasy arqyly dodaly jarystyń beldesýlerin tamashalaı alady.
Álem chempıonaty aıasynda alys-jaqyn shet elderdiń ókilderiniń qatysýymen Dúnıejúzilik «Qazaq kúresi» federasııasynyń Halyqaralyq Kongressi ótedi.
Sondaı-aq jıynnyń kún tártibinde federasııa alqa músheleriniń saılanýy jáne basqa da máseleler qarastyrylady. Halyqaralyq Kongress «Pekın Palas» qonaq úıiniń «Silk way» májilis zalynda 2019 jyldyń 19-jeltoqsanda saǵat 11.00-de bastalady.
Jarys Birikken Kúres Álemi, Nur-Sultan qalasynyń ákimdigi, Dúnıejúzilik «Qazaq kúresi» federasııasynyń uıymdastyrýymen ótedi. Sondaı-aq jarystyń ótýine «Eurasian Resources Group» (ERG) kompanııasy qoldaý kórsetti.
