Aýdandaǵy órt sóndirý beketine habar jetisimen, olar eki mınýttyń ishinde oqıǵa ornynan tabylǵan. Az ýaqyttyń ishinde órt aýyzdyqtalǵanmen, oqys oqıǵa tórt jandy jalmap úlgergen edi.
Keshki aqsham jamyraǵan kezde úlken otbasy dastarqan basyna otyrady. Otbasyndaǵy on kisiniń sol kúni toǵyzy úıde bolatyn. Qostanaı oblystyq tótenshe jaǵdaılar departamentiniń bastyǵy Talǵat Kákimovtiń aıtýyna qaraǵanda, kúndelikti paıdalanyp júrgen gaz taýsylyp qalady da, olar daladaǵy ballondy úıge kirgizedi. Mólsherden artyq toltyrylǵan ballon úıge kirgizgende temperatýranyń kúrt ózgerýinen jarylady da, órt shyǵady. As úıde júrgen 1985 jylǵy áıel men 2019 jyly týǵan qos náreste jáne as úımen qabyrǵalas bólmedegi 1938 jylǵy qart ana sol jerde til tartpaı ketedi. Úı ıesi basqa bólmedegi balalaryn alyp shyǵady, biraq olardyń barlyǵy da túrli dárejede kúıik jaraqatyn aldy. Zardap shekkenderdiń arasynda 10, 8 jáne 5 jasar úsh balanyń denesin 10 paıyzdan 40 paıyzǵa deıin kúıik shaldy. Al 22 jastaǵy áıel men 34 jastaǵy er kisiniń denesi 70 paıyzǵa deıin kúıip qaldy.
Alǵashqy kezde Amangeldi, Jangeldın aýdandyq jáne Arqalyq qalalyq aýrýhanalarynyń feldsherlik brıgadalary baryp, jedel kómek kórsetti. Tosyn oqıǵa bolǵan kúnniń erteńine jáne bir kúnnen keıin zardap shekkender sanıtarlyq ushaqpen Qostanaı qalasyndaǵy oblystyq aýrýhana men oblystyq balalar aýrýhanasyna jetkiziledi. Al qazir olardyń barlyǵy da respýblıkalyq sanıtarlyq áýe kemesimen jedel túrde Nur-Sultan qalalyq aýrýhanalaryna jetkizilip, em alyp jatyr.
QOSTANAI
