Baqytjan Saǵyntaev «Erkin mıkrofon» formatynda Almaly aýdanynyń turǵyndarymen ekinshi márte kezdesýin ótkizdi. Aǵymdaǵy jyldyń 28 tamyzynda ótken alǵashqy kezdesýde ákim turǵyndardyń júzge jýyq suraqtaryna jaýap berip, sheshilý joldaryna qatysty derektermen bólisken bolatyn.
Qala ákimdiginiń Baspasóz qyzmeti málimeti boıynsha, 1932 jyly qurylǵan Almaly aýdany mádenı jáne qoǵamdyq ómirdiń tarıhı ortalyǵy bolyp sanalady. Aýdanda sýmen, jylýmen, kárizben jáne elektrmen qamtamasyz etý máselesi tolyq sheshilgen degenmen ýrbanıstıka jáne jaıly orta máseleleri áli de ózekti bolyp tabylady.
Aýdanda taǵy 18 km trotýar salý jáne halyqtyń múmkindigi shekteýli toby úshin 28 km joldy rekonstrýksııalaý qajet. 26 ýchaske mańyna syrtqy jaryq ornatylady, sonymen qatar 49 aýla aımaǵy men 68 kóshege qosymsha jaryq beriledi.
Polısııanyń jańa servıstik jumysynyń arqasynda aýdanda adamdar kóp jınalatyn oryndar men stıhııaly saýda ýchaskelerine polısııanyń úsh modýldi postysy qoıyldy, olardyń kómegine 175 turǵyn júgingen.
2016-2017 jyldary jóndelgen aýla ishindegi aımaqtardaǵy balalar jáne sport alańdaryn qaıta qalpyna keltirý qıynǵa soǵýda. Sol kezde salynǵan 221 aýladaǵy sport jáne oıyn alańdary keler jyly jóndeledi. Aýdanda keler jyly 192 aýla jóndeledi, qalǵan 52 aýla 2021 jyly jańarady.
Jeke ınvestorlardyń kómegimen eski úılerdiń problemasy sheshilýde, aǵymdaǵy jyly aýdanda 7 eski úı súrilgen, 52 otbasy baspanasyn jaqsartqan. Jalpy, osy máseleni utymdy sheshý úshin qalalyqtardyń belsendilik tanytýlary jáne ınvestor usynǵan nusqa boıynsha biraýyzdan sheshim qabyldaǵandary jón.
Oqýshy ornynyń tapshylyǵyn joıý úshin Raıymbek dańǵyly men Tilendıev kóshesi boıynda 1000 oryndy mektep salý josparlanǵan. Aıta keterligi, keler jyly №144 mektep-gımnazııa janynan qosalqy nysan salý úshin qujattar ázirlenýde.
Kezdesýde PIK-terdiń jumysyna jáne «Almatytelekom» kompanııasynyń baılanys qyzmetine kóp shaǵym aıtyldy. Degenmen, turǵyndar ekologııa men jasyldandyrýdy jaqsartý, onyń ishinde shyrsha baǵyn bólý boıynsha usynystaryn aıtty. Sonymen qatar, turǵyndar kóshelerdegi qoqys jáshikteriniń azdyǵyna, parkter men kóńil kóteretin oryndarda qaýipsizdikti qamtamasyz etýge nazar aýdardy.
Aýdan turǵyndaryn qoǵamdyq kóliktiń jumysy da tolǵandyrady. Almaty ákimi B. Saǵyntaev avtobýstar tapshylyǵy qala jáne jeke avtoparkter esebinen tolyǵatynyn atap ótti. Trolleıbýstar qozǵalysyna da esh shekteý bolmaıtynyn aıtqan B. Saǵyntaev kelesi jyly baılanys jelileri men ınfraqurylymynyń jańaratynyn aıtty. Kezdesý barysynda ákim turǵyndardy qala ómirin jaqsartýǵa belsendi bolýǵa shaqyrdy.
