Ishki ister mınıstri E. Turǵymbaev osy jyldyń 16-22 jeltoqsan aralyǵynda elimizde 104 jol-kólik oqıǵasy tirkelip, solardyń saldarynan 39 adam qaza taýyp, 158 adam túrli dene jaraqattaryn alǵanyn aıtty.
Aýa-raıy jaǵdaılary joldardaǵy jaǵdaıǵa keri áserin tıgizdi. Temperatýranyń nól gradýsqa deıin kúrt kóterilýi jáne sonyń saldarynan kóktaıǵaqtyń qalyptasýy, sonymen qatar jańbyr men qardyń jaýýynyń, tumannyń áserinen joldyń kórinýiniń shektelýi — qala syrtyndaǵy joldardaǵy apattylyqtyń artýyna ákelip soqty.
О́tken aptada polısııa tótenshe jaǵdaılar bólimshelerimen jáne «Qazavtojol» UK» AQ-men birge 11 oblysta respýblıkalyq jáne jergilikti mańyzy bar joldarda kólik quraldarynyń qozǵalysyn shektedi.
Jalpy uzyndyǵy shamamen 7,5 myń shaqyrym bolatyn respýblıkalyq mańyzy bar joldardyń 57 ýchaskesi jabyldy (7,272 km).
Eń qıyn jaǵdaı Shyǵys Qazaqstan, Aqtóbe, Jambyl jáne Batys Qazaqstan oblystarynda baıqaldy.
Ishki ister organdary kommýnaldyq qyzmettermen jáne jergilikti atqarýshy organdarmen birlesip, keptelisterdi joıý, joldardy tazartý, ınertti materıaldardy sebý, evakýasııalaý jáne azamattarǵa shuǵyl kómek kórsetý sharalaryn oryndady.
Shamamen 1 myń avtomashına kepteliste qalǵan, barlyǵy qar qursaýynan 120-dan astam avtomashına men 900-den astam adam evakýasııalandy. Evakýasııalanǵan azamattar jaqyn mańdaǵy eldi mekenderde ornalasqan jylytý pýnktterine ornalastyryldy. О́ńirlerde azamattarǵa kómek kórsetý úshin jedel shtabtar quryldy.
Adamdardy qutqarýǵa TJK-niń 200-den astam qyzmetkeri men 300 polısııa qyzmetkeri, 170 birlik qutqarý tehnıkasy men polısııa mashınalary, sondaı-aq jergilikti atqarýshy organdar men jol qyzmetteriniń arnaıy tehnıkalary tartylǵan.
Qazirgi ýaqytta Shyǵys Qazaqstan, Atyraý, Aqmola, Qostanaı, Qyzylorda, Pavlodar, Soltústik Qazaqstan jáne Túrkistan oblystarynda kúrdeli jaǵdaı saqtalýda.
«Júrgizýshiler men jolaýshylardyń qaýipsizdigin qamtamasyz etý óte mańyzdy másele. Taıaý ýaqytta, boljam boıynsha, alda borandar bolyp, aýa temperatýrasy tómendeıdi. Barlyq qyzmetter buǵan daıyn bolýy kerek», — dedi A. Mamın.
Úkimet basshysy óńirlerdiń ákimdikterine joldarda jylytý jáne tamaqtandyrý pýnktterin uıymdastyrýǵa járdemdesýdi tapsyrdy.
«Indýstrııa jáne ınfraqurylymdyq damý mınıstrligine jáne Qazavtojolǵa joldardy qardan jáne muzdan tazartýǵa tehnıkany barynsha tartýdy tapsyramyn. QR IIM avtotrassalarda kezekshilik pen qaýipsizdikti qamtamasyz etý jumysyn jalǵastyrsyn», — dedi A. Mamın.
