Bul týraly esepti jyldy qortyndylaǵan jıynda Sybaılas jemqorlyqqa qarsy kúres agenttiginiń Almaty oblysy boıynsha departamenti basshysynyń orynbasary Jandos Jumabaev málimdedi. Atap aıtqanda, jyl basynan beri 81 para alý oqıǵasy áshkerelenip, qyzmet babyn asyra paıdalanýdyń 11 deregi anyqtalǵan. Nátıjesinde jekelegen tulǵaǵa qatysty 63 qylmystyq is ashylyp, 43 adam sottalǵan. Jaýapqa tartylǵan qyzmetkerler arasynda 6 oblystyq deńgeıdegi basshy, 5 orta sanattaǵy laýazymdy tulǵa bar. Búginge deıin 87 is sotqa jiberilipti.
Sondaı-aq sheneýnikter tarapynan shaǵyn jáne orta bıznes nysandaryna qysym jasaý azaımaı otyrǵan kórinedi. Dál osyndaı mazmundaǵy 17 shaǵym qabyldanyp, 13 laýazym ıesi jaýapkershilikke tartylǵan. 35 kásipkerdiń quqy qorǵaldy.
Al oblystaǵy sybaılas jemqorlyq derekteri jıi baıqalatyn qyzmetterdiń kóshin ákimdik qyzmetkerleri bastap tur eken. О́tken 11 aıda sheneýnikterdiń para alýyna qatysty 26 oqıǵa anyqtalǵan. Jer qatynastary bóliminiń qyzmetkerleri de ákimdik ókilderinen qalyspapty, 11 aıda 12 derek tirkelgen. Ishki ister organdary men qurylys salasynda da para alýdyń ondaǵan mysaly baıqalsa, áleýmettik qorǵaý qyzmetiniń 8 ókili jemqorlyqqa qatysty aıyptalyp otyr.
