Jetisýdyń bir ózeni – Ileniń Balqash kóline quıatyn tusynda kindik qany tamǵan Álı aqsaqal alǵashqy óleńin bala jasynda jazypty. Tabıǵat, ana meıirimi, kóz súıindiretin kórkem kórinisterdiń barlyǵy bala aqynnyń qııalyn ushtap, shyǵarmashylyǵyna qanat bitirgen. Balǵyn shaqtan bastalǵan jyr aǵyny Álı Ysqabaıdyń tutas ǵumyryna arqaý bolyp, balalarǵa arnalǵan týyndylar jazýǵa jetelep keledi.
Qazir aqynnyń qalamynan týǵan «Aıdostyń arǵymaǵy», «Meniń inim», «Soldat aǵaǵa hat», «Besik jyry», «Eńbekqor qumyrsqa» jyr jınaqtary qazaq balalar ádebıetine qosylǵan orasan olja bolyp sanalady. Mektep oqýlyqtarynyń derliginde avtordyń balalarǵa arnalǵan óleńderi kirgen. Aqsaqal el aýzyndaǵy maqal-mátelderdi, jumbaqtardy jınap, dáıekti sózdiń izimen ózi de naqyl jyrdyń marjanyn terip keledi. Bala talǵamyna tatıtyn «777 jumbaq», «Til men jyr» atty jınaqtary el oqyrmandaryna etene tanys.
Aǵa áriptesimiz – «Egemen Qazaqstan» gazetiniń ardageri. Eńbek jolyn ózi týyp-ósken Quıǵan aýylynda qatardaǵy jumysshy bolyp bastaǵan ol 1958 jyly Balqash aýdandyq gazetine ádebı qyzmetkerlikke qabyldanǵan eken. Bul Álı Ápekulynyń jýrnalıstıkadaǵy alǵashqy qadamy edi. Artynsha, jýrnalıstik bilim alyp júrgen tusta ortalyq baspasózge jıi jarııalana bastady. Kóbine jazǵan-syzǵandaryn sol kezdegi «Sosıalıstik Qazaqstan» gazetine aparatyn. 1973 jyly Mańǵystaý oblysy quryldy da, bas gazet redaksııasy jańa aımaqtaǵy menshikti tilshi izdep jatty. Redaksııanyń tańdaýy qalamy qarymdy Álı Ysqabaıǵa túsken. Tilshi kýáligin qolyna alǵan kúni-aq qazirgi Aqtaý, burynǵy Fort-Shevchenko qalasyna tartty.
– Jańa oblysta jumys qyzyp jatty. Munaı óndirý isi kún sanap artyp keledi. Qurylys ta qyzyp berdi. Ol kezde «Sosıalıstik Qazaqstannyń» menshikti tilshisi partııa men sovet organynyń eń bedeldi ókilinen de joǵary turatyn. Birden baspana berdi, qyzmettik kólikke otyrǵyzdy. Eńbek kórigi qyzǵan ólkeden kún qurǵatpaı aqparat berip turdym. Aýyz sý, jol máselesine qatysty turǵyndar jıi shaǵymdanatyn edi. Meılinshe, redaksııa basshylyǵynyń tapsyrmasymen qazaqy aýdandardyń problemasyn jıi jazyp otyrdym. Eki jylǵa jýyq qyzmetimde jergilikti turǵyndardan tek alǵys estidim. Keıin Taldyqorǵan oblystyq «Oktıabr týy» gazetine bas redaktordyń orynbasary bolyp qyzmetke shaqyryldym da, úsh qııan jurtymen qımaı qoshtasyp, elge oraldym, – deıdi Álı aqsaqal.
Seksen jasqa tolǵan aqyn, jýrnalıst áli tyń. Aımaqtaǵy qoǵamdyq jumystan qol úzgen emes. Jaqynda bir kezde ózi qyzmet etken bas basylymnyń mereıtoıyna oraı ótken jıynda «Egemen Qazaqstan» gazetine – 100 jyl» arnaıy medalimen marapattaldy.
Almaty oblysy
