Bıiktigi 20, eni 2,4 metr bolatyn tuǵyr tutastaı sapaly betonnan quıylǵan. Onyń bir jaq qyrynda respýblıka Gımniniń mátini, ekinshi jaq betinde Gımnniń notaǵa túsirilgen mýzykalyq nusqasy, al úshinshi jaq qyrynda memlekettik rámizderdiń avtorlary týraly málimetter naqyshtalyp berilgen. Tórtinshi qyrynda Aqtóbe degen sóz jazylyp, osy qalanyń nyshandyq belgisi –qyzǵaldyq kórinis tapqan. Táýelsizdik tuǵyrynyń ushar basynda ornalasqan Eltańba eki jaqqa birdeı kórinedi. Onyń salmaǵy 250 kg bolsa, dıametri 215 sm.
- Birtutas kompazısııalyq júıe quraıtyn eskertkishtiń joǵary bóliginde endi ashylyp kele jatqan qyzǵaldaq beınelengen. Bul jyldan-jylǵa damyp, ósip-órkendeý jolyndaǵy memleketimizdiń nyshany. Tuǵyrdyń segiz qyrly bolyp kórinis tabýy Qazaqstannyń álemniń qaı elimen bolsa da ashyqtyǵymen jaqsy qarym-qatynasynyń kórinisi. Sondaı-aq tórt buryshta beınelengen túrki áleminiń stılindegi beıne kórinister Qazaqstannyń 200-den astam álem memleketteriniń arasyndaǵy óz orny bar myǵym memleket ekenin aıshyqtaýdy maqsat ettik de ıdi joba avtory, belgili kásipker Arynǵazy Berkinbaev. Ol munda taǵy bir memlekettik rámiz týdyń beınelenbeýin – Tuńǵysh Prezıdent atyndaǵy saıabaqtaǵy buǵan deıin onyń kórinis tabýymen túsindirdi.
Sondaı-aq munda zoomorftyq jáne geometrııalyq elementter men ósimdik sıpatyndaǵy oıý-órnekter beınelengen. Al tustastaı sáýlet óneri týyndysynyń túsi uly dalamyzdyń sıpatyna jaqyndaıdy. Tutastaı alǵanda jańa tuǵyr memleketimizdiń basty nyshandary – memlekettik rámizderdi ulyqtaýǵa arnalǵan. A.Berkinbaevtyń aıtýynsha oǵan beton, temir, plastık jáne boıaý túrleri sekildi jergilikti qurylys materıaldary paıdalanylǵan. Táýelsizdik tuǵyry ornatylǵan aýmaqta tabıǵat janashyrlary qaraǵaı men ózge de sándi aǵash kóshetterin otyrǵyzǵany da jarasymyn tapqan istiń jalǵasyndaı kórinedi.
Mine, osylaısha tarıh qoınaýyna ketip bara jatqan 2019 jyly Aqtóbede táýelsizdikke arnalǵan eskertkishtiń ashylýy halqymyzdyń órshil de, erkin rýhyn pash etip turǵandaı áser qaldyrady.
