2019 jyldyń kúz aılarynan beri oblysta dıagnozy ázirge belgisiz aýrýmen 1139 túıe aýyrǵan, 1112 túıe emdelip saýyqqan, 27 bas túıege qazir veterınarııalyq kómek kórsetilýde. Aıta keteıik, iri qaranyń ólimi tirkelgen joq.
-Juqpaly aýrýdan túıeniń aýyz qýysy, erinderi men muryny qabynyp, maldyń shóp jeýi, sý ishýi qıyndap, mal júdegen. Antıbıotıktermen ýaqtyly emdelgen túıeler 1 aptanyń ishinde tolyqtaı saýyǵyp ketedi, deıdi Aýyl sharýashylyq mınıstrligi veterınarııalyq baqylaý jáne qadaǵalaý komıtetiniń Mańǵystaý oblystyq aýmaqtyq ınspeksııasynyń basshysy Qýanyshkereı Myrzatov.
Juqpaly aýrýdyń dıagnozy veterınarııalyq dıagnostıkalyq zerthananyń qorytyndysy negizinde ǵana belgili bolady. Aýyl sharýashylyǵy mınıstrligine qarasy dıagnostıkalyq ortalyqqa barlyǵy 70 bastaı túıeden synamalar alynyp, teskerýden ótkizilgen. Oblysqa 3 ret ortalyqtyń ekspert mamandary shaqyrtylyp, monıtorıng júrgizilgen. Dıagnostıkalyq mekemelerdiń qorytyndylaryna sáıkes, zerttelgen túıelerde asa qaýipi aýrýlar anyqtalmaǵan.
Jeltoqsan aıynyń basynda 12 túıeden alynǵan materıaldar elimizdiń 3 túrli táýelsiz veterınarııalyq ǵylymı-zertteý ınstıtýttaryna joldanǵan. Vırýsologııalyq zertteýler qorytyndysy ázirge shyqqan joq, jaqyn aralyqta bolady dep kútilýde. Eger asa qaýipti juqpaly aýrýlar anyqtalatyn bolsa, Veterınarııa salasyndaǵy zańnamalaryna sáıkes, aýrýdy joıý jumystary júrgiziletin bolady.
Túıe aýrýyna baılanysty jaǵdaı týraly Úkimet basshysy habardar etildi, oblys ákiminiń atynan Premer-mnıstrge hat joldanyp, aýyl sharýashylyǵy mınıstrligine shuǵyl sharalar qabyldaý týraly tapsyrma berý suralǵan.
