«IIM ushaqtyń apatqa ushyraýyna ákep soqqan sebepter men jaǵdaılardy sapaly jáne obektıvti tekserý júrgizedi. Tergeý barysynda barlyq qujattar, aýdıo jáne beınejazbalar zertteledi. Áýe kemesiniń jaı-kúıine birqatar saraptama, onyń ishinde órt-tehnıkalyq jáne kóliktik - trassologııalyq saraptama taǵaıyndaldy», - dedi Ishki ister mınıstri Erlan Turǵymbaev.
IIM basshysy tergeýshiler áýe apatyna ákep soqtyrǵan barlyq oqıǵalardyń hronologııasyn qalpyna keltirý kerektigin atap ótti. Osy maqsatta qyzmetkerler ushýdy uıymdastyrý men ótkizýge qatysatyn barlyq jerdegi jáne avıasııalyq qyzmetterdiń jumysyn tekseredi, jaýapty tulǵalardan jaýap alý jáne osy reıstiń jolaýshylarynan saýalnama alý júrgiziledi. Ushý-qoný jolaǵyna tekserý júrgizildi. Áýe kemesinen ózdiginen jazǵysh quraldary men bort jýrnaly alyndy.
Qazirgi ýaqytta ushaqtyń qulaý aýdanyn tekserý jalǵasýda. Halyqaralyq talaptarǵa jáne osy sanattaǵy qylmystyq isterdi tergeý erekshelikterine sáıkes oǵan halyqaralyq avıasııa komıtetiniń (HAK) jáne ushaqty daıyndaýshy zaýyttyń ókilderi qatysady, olarmen birge alynǵan ózdiginen jazý quraldaryndaǵy jazbalardyń mánin anyqtaý, keme qozǵaltqyshy men oqıǵa ornyn tekserý júrgiziledi.
Apatqa ushyraǵan áýe kemesi 1996 jyly Gollandııada «Fokker» zaýytynda jasalyp, 2020 jyldyń 21 mamyryna deıin ushý jaramdylyǵy sertıfıkatyna ıe bolǵany anyqtaldy.
Jedel-tergeý toby birneshe nusqalardy, sonyń ishinde kemeniń tehnıkalyq aqaýyn, aýa raıy jáne meteorologııalyq jaǵdaılardy, sondaı-aq ushý kezinde jiberilýi múmkin qatelerdi pysyqtaıdy.
28 jeltoqsandaǵy jaǵdaı boıynsha Almaty qalasynyń medısınalyq mekemelerinde 47 zardap shekken, onyń ishinde 9 bala stasıonarlyq emdelýde. Zardap shekken 4 adamǵa medısınalyq tekserýden keıin ambýlatorlyq em taǵaıyndalyp, úılerine jiberildi. Qaza bolǵandardyń sany ózgergen joq (12 adam).
