Qyzylorda, Mańǵystaý, Almaty, Kókshetaý óńirleriniń oryndaýshylary qatysqan festıval Abaıdyń 175 jyldyǵyna, táýelsizdik merekesine arnaldy.
Dástúrli án keshin jergilikti jas aqyn, termeshi Jiger Bóken arnaý ánimen bastap berdi. Ánshi Erbol Aıtbaev Estaıdyń ánderin áýeletse, «Tekti sózdiń tóresi – terme» baıqaýynyń júldegeri Saltanat Qısatova ataqty Maıranyń ánderin shyrqady.
Ánshi-jyrshy, termeshiler sahna tórine tigilgen kıiz úıdiń ishinde burynǵy sal-serilerdeı birinen soń biri ortaǵa shyǵyp, óz óńirleriniń maqamyna saı eki ánnen oryndady.
Aldymen Birjan sal, Aqan seri, Balýan Sholaq, Úkili Ybyraılardyń izin basyp, úkili dombyrany serik etken kókshetaýlyq seriler kórindi.
Arqanyń dástúrli án mektebiniń túlegi Nazıra Beısenova Buqar jyraýdyń «Batyryń óldi, Bógenbaı!» dep atalatyn tolǵaýyn, Úkili Ybyraıdyń «Gákkýin» usyndy.
Kelesi sátte Syr dástúrli án mektebiniń kórnekti ókilderi Nurtýǵan, Jıenbaı, Nartaı, Sársenbaı jyraýlardyń maqamdarymen jyr aıtý dástúrin jalǵap júrgen Marat Súgirbaı Turmaǵambettiń «О́sıet», Shoraıaqtyń Omarynyń «Ádil is» termesin, halyq áni «Shıli ózendi» oryndap berdi.
Syrdyń sarynyn Qarmaqshy aýdanynan kelgen jyrshy-termeshi Kúnsulý Túrikpen jalǵastyrdy.
Budan keıin kórermender Mańǵystaý maqamyna qulaq túrdi. Nartaı jáne Súgir jyraýlardyń jyr-termelerin nasıhattap júrgen Ospan Qulsymaq Uzaqbaı jyraýdyń «Májiliste sóz bastaý» termesin tógiltti.
Al Jetisý óńirinen kelgen Shattyq Ýatqan Súıinbaı, Jambyl, Kenender jolyn jalǵap júrgenin kópshilikke pash etti. Baıanaýyldyq Azamat Bazarbaı Maılyqojanyń termesi «Ata-ananyń qadirin» oryndady.
Al Qytaıdan tarıhı otanyna oralǵan qandas baýyrlarymyz: aýdandyq mádenıet úıinde qyzmet etip júrgen respýblıkalyq estrada-sırk kolledjiniń túlegi Jalyn Qunanbaı, halyqaralyq Qazaq-túrik ýnıversıtetiniń túlegi Erbaq Qurmetjan, Qytaıdaǵy «Kúıtún» aqyndar ınstıtýtyn bitirgen Bóken Jiger aýdandyq mádenıet bólimimen birlese otyryp osy sharany uıymdastyrýǵa úlken úles qosty.
– Ulttyń mádenıeti – dástúrli áninde. Án-jyrymyz – qundylyq. Án áýelese –qazaqtyń rýhy oıanady, sanasy ashylady. О́ıtkeni eldigimiz, órligimiz, salt-dástúr, basqa da qundylyqtar qudiretin halyq ánderinen tabasyz, – deıdi dástúrli ánderdi oryndaýshy Erbol Aıtbaev.
Rýhanı mándi sharadan soń oblystyq mádenıet, tilderdi damytý jáne arhıv isi basqarmasy óner kórsetken ánshilerdi aqshalaı, baǵaly syılyqtarmen marapattady.
Ánshiler festıvaline oblys ákimdigi, Aqsý, Ekibastuz, Sharbaqty, Jelezın, Tereńkól, Aqqýly aýdandary ákimdikteri demeýshilik kórsetti.
Oblystyq mádenıet, tilderdi damytý jáne arhıv isi basqarmasynyń basshysy Ernur Dáýenovtiń aıtýynsha, bizdiń óńirge kelip halyq ánderin áýeletken, terme tógiltip, jyrdan shashý shashqan ánshi-kúıshi, termeshilerdiń barlyǵy da elimizdegi dástúrli án, jyr-terme mektepteriniń qazirgi tolqyny. Maqsat – ulttyq qazyna halyq ánderin, jyr-termelerin nasıhattaý.
Aldaǵy jyly oblystyq mádenıet basqarmasy Estaı atyndaǵy dástúrli ánshiler baıqaýyn, respýblıkalyq aqyndar aıtysyn, Maıra Shamsýtdınova atyndaǵy án baıqaýyn, «Aqyn men ánshi» sııaqty rýhanı jobalardy júzege asyrmaq.
Pavlodar oblysy,
Ýspen aýdany
