Shaǵyn aýylda aıaq kıimder shyǵarylady

Elimizde óziniń hal-qaderine qaraı kásip ashýǵa umtylýshylar sany artyp keledi. Sonyń biri Mańǵystaý oblysynyń Qaraqııa aýdany, Quryq aýylynda tusaýyn kesti. «Aishah_ shoes» aıaq kıim óndirý sheberhanasynyń ashylýy – shaǵyn aýyldaǵy aıtýly jańalyq boldy. Igi sharaǵa Qaraqııa aýdan­dyq kásipkerlik jáne ónerkásip bóliminiń basshysy Álııa Jumabaıqyzy, «Atameken» kásipkerler palatasynyń aýdandyq fılıalynyń dırektory Amanat Mahmutov pen turǵyndar qatysty.

 Aınur Toqbaeva «Ersai» kompanııasynyń «Ortalyq Azııanyń Eýrazııa qory» jobasynan 1 mln 300 myń teńge grant utyp alǵan bolatyn. Jańa isti  týystarymen birigip qolǵa alyp, otba­syl­yq kásipke aınaldyrdy. О́ńir turǵyn­darynyń qyzy­ǵý­shylyǵyn týdyrǵan otandyq ónimniń aıasy keńeıip, Shaıyr aýylynan da ashyldy. Qazir sheberhana er adamdarǵa arnalǵan qystyq aıaq kıim­der toptamasyn tigip, tutynýshylarǵa usynyp otyr. Jalpy munda aıaq kıimniń 10 túri tigiledi. Aıyna 50 shaqty aıaq kıim daıyndaýǵa qaýqarly.

 – Aıaq kıimder sıyr terisinen, ishki jaǵy qoı­dyń júninen tigilgen. Aıaqty terletpeıdi, yńǵaıly ári sapaly. Tapsyrystar qabyldanyp jatyr. Shı­ki­zattar Shymkent qalasynan, Túrkııa men О́z­bek­stan­nan da tasymaldanýda, – deıdi Aınur Toqbaeva.

Aıaq kıimder baǵasy naryqtan áldeqaıda tómen, kópshilikke qoljetimdi. Máselen qysqy etikter 22 myń teńge bolsa, krossovkalar 18 myń teńgeni quraıdy. Sheberhana úsh adamdy jumyspen qamtyp otyr. Bul kásipti ashý úshin otbasy músheleri Nur-Sultannan aıaq kıim tigý ádisin arnaıy úırenip kelgen. Kásiptiń qyr-syryn biletin mamandar qajettigi ańǵarylady.  Bıznes aıaqtan nyq turyp, ekpindi aınalym alyp ketse, áıelder aıaq kıimin tigip shyǵarý da josparda bar eken.

– Mundaı kásip túri aýdanda buryn bolǵan emes. Erekshe bıznes jobaǵa qaıtarymsyz qara­jat berildi. О́nerkásip salasynyń damýy otan­dyq ónimniń serpilisine úles qosady, – deıdi «Atameken» kásipkerler palatasynyń aýdandyq fılıalynyń dırektory Amanat Mahmutov.

Aıaq kıim – halyqqa qajetti ónim. Iisi de, baǵa­sy da «burqyrap turǵan» sheteldik ónimderge urynbaı, ıaǵnı «alystan arbalamaı, jaqynnan dorbalaǵan» jaqsy-aý. Otandyq kásiporyndar aıaq­tan nyq turyp, sapaly ónimdermen óz sóre­lerimizdi syqa toltyrsa deısiń!

Mańǵystaý oblysy