Fokker 100 – orta qashyqtyqtaǵy jolaýshylar ushaǵy. Nıderlandtyq avıaqurylys kompanııasynyń eń kóp serııamen shyǵarǵan ónimi. Ushaq ataýy atalǵan kompanııanyń negizin qalaýshy Anton Fokkerdiń esimimen atalǵan. Ushaqqa 107 adamǵa deıin syıatyn bolǵandyqtan da atalǵan markaǵa 100 ataýy berilgen. Bul qysqa jáne orta qashyqtyqtaǵy reısterdi oryndaýǵa arnalǵan áýe borty. Áýe kemesiniń korpýsy ensiz, tarlaý bolyp keledi. Biraq ushqyr ári únemdi model 1980 jyldardyń sońynda Bombardier CRJ200 men Embraer ERJ 145 áýe kólikteriniń jetildirilgen túri paıda bolǵanǵa deıin suranysqa keńinen ıe boldy. Fokker 100 qýatyn arttyrǵan qurylǵy Rolls-Royce Tay Mk 620-15 eki birdeı týrbo ventılıatorly qozǵaltqyshynyń ornatylýy bolatyn.
Alǵashqy Fokker 100 1986 jyly 30 qarashada áýege kóterildi. Al sertıfıkattaýy 1987 jyly qarasha aıynda aıaqtaldy. 1988 jyly aqpan aıynda ushaqtyń tuńǵysh ret paıdalanýǵa berilgen serııasyna ıe bolǵan Swissair áýe kompanııasy jolaýshylardy tasymaldaı bastady. Ushaq naryqta ótimdi bolǵanymen, kompanııa menedjmentiniń tıimsizdiginen 1996 jyly birjola taqyrǵa otyrdy. Fokker 100 ushaqtaryn shyǵarý 1997 jyly toqtatyldy. Zaýyttan barlyǵy 283 áýe kemesi shyǵaryldy. 2006 jylǵy málimet boıynsha álemniń 47 áýe kompanııasynda 229 ushaq jolaýshylarǵa qyzmet kórsetip keledi.
Al keshegi Almatydaǵy apatty qosa alǵanda barlyǵy 17 Fokker 100 ushaǵy apatqa ushyraǵan. Eki márte atalǵan ushaqty urlaýǵa tyrysý oqıǵasy tirkelgen, biraq eshkim zardap shekpegen. Jalpy alǵanda, osy oqıǵalardan 183 adam qaza bolǵan. Onyń ishinde eń iri apattardy atap óter bolsaq, 1993 jyly 5 naýryzda Skopede (Makedonııa) 97 jolaýshynyń 83-i qaza bolsa, 1996 jyly 31 qazanda San-Paýlýda 95 jolaýshy túgel opat boldy. Eki oqıǵada da apat áýege kóterilý kezinde bolǵan.
