Memlekettik hatshy Gúlshara Ábdiqalyqova qatysqan jıynda memlekettik organdardyń, halyqaralyq uıymdardyń, dıplomatııalyq korpýstyń, bilim jáne ǵylym salalarynyń ókilderi jáne kórnekti qoǵam qaıratkerleri de jınaldy. Otyrysqa agenttik tóraǵasy Qaırat Qojamjarov jetekshilik etti.
Sybaılas jemqorlyqqa qarsy kúres júrgizýdiń baǵyt-baǵdarlaryn strategııalyq turǵyda zerdeleı otyryp, halyqaralyq sheńberdegi áriptestikti tereńdetýdi maqsat etken konferensııada aldymen Gúlshara Ábdiqalyqova sóz sóıledi. Memlekettik hatshy quttyqtaý sózinde mundaı basqosý Qazaqstan Táýelsizdiginiń 25 jyldyǵyn merekeleý qarsańynda ótip otyrǵanyna toqtaldy. «О́tken jyldary memleketimiz sybaılas jemqorlyqqa qarsy is-qımyl máselelerine qatysty aýqymdy sharalar qabyldady. Búgingi kúni Qazaqstan sybaılas jemqorlyqqa qarsy saıasatty iske asyrýdyń sapaly jańa kezeńine kóshti, onyń mazmuny «Qazaqstan-2050» Strategııasynda jáne «100 naqty qadam» «Ult josparynda, sondaı-aq, Sybaılas jemqorlyqqa qarsy kúrestiń 2015-2025 jyldarǵa arnalǵan strategııasynda aıqyndalǵan», dedi G.Ábdiqalyqova.
Sonymen qatar, ol sybaılas jemqorlyqqa qarsy kúres jónindegi sharalardy odan ári kúsheıtý baǵytynda Qazaqstan Prezıdenti tabandy ustanymdy basshylyqqa alǵanyn atap ótti. «Sol sebepten de elimiz sybaılas jemqorlyqqa qarsy is-qımyldyń álemdik standarttaryna sáıkes keletin tıimdi tetikterin qalyptastyrý jóninde júıeli is-áreketter qabyldaýda. «Sybaılas jemqorlyqqa qarsy is-qımyl týraly» jańa zań sybaılas jemqorlyqqa qarsy monıtorıng, sybaılas jemqorlyq qaterlerin júıeli taldaý jáne sybaılas jemqorlyqqa qarsy oqý-aǵartý isi sııaqty keń aýqymdy quqyqtyq tásilderdi tájirıbege engizdi. Al halyqaralyq yntymaqtastyqty nyǵaıtýdyń mańyzdylyǵy jóninde aıtar bolsaq, bul baǵyttaǵy jumystarymyz da júıeli iske asyrylýda.
Qazaqstan BUU-nyń Sybaılas jemqorlyqqa qarsy konvensııasynyń, Sybaılas jemqorlyqqa qarsy vedomstvolar qaýymdastyǵynyń, Ekonomıkalyq yntymaqtastyq jáne damý uıymynyń (EYDU) Sybaılas jemqorlyqqa qarsy kúres jónindegi Ystanbul is-qımyl josparynyń jáne basqa da halyqaralyq uıymdardyń múshesi bolyp tabylady», dedi Gúlshara Naýshaqyzy.
Memleket basshysynyń «100 naqty qadam» Ult josparynda sybaılas jemqorlyqqa qarsy kúres saıasatynyń baǵyt-baǵdary ashyq ári naqty kórsetilgenin tilge tıek etken Q.Qojamjarov munda negizgi basymdyq damyǵan elderdiń tájirıbesine arqa súıeý bolatyndyǵyn basa aıtty. Sonyń ishinde Qazaqstan qazirgi tańda álemdik qoǵamdastyqta moıyndalǵan ádis – sybaılastyqqa táýekel jasaýdy baqylaý men ony saralaýdy óz qyzmetinde birinshi kezekte qoldanysqa engizgen. Sonymen qatar, uıymdastyrylatyn túrli qoǵamdyq-mádenı sharalar aıasynda «Máńgilik El» jalpyulttyq ıdeıasy azamattar sanasyna keńinen sińirilip jatqany atap kórsetildi.
Álemdik deńgeıdegi halyqaralyq uıymdardyń ókilderi qatysqan alqaly jıynnyń maqsaty erkin pikir almasý arqyly ozyq tájirıbelerdi talqylaý boldy. Osy rette agenttik tóraǵasynyń orynbasary Alık Shpekbaev «Qazaqstannyń sybaılas jemqorlyqqa qarsy zamanaýı saıasaty: tájirıbe men jetistikter» taqyrybynda baıandama jasady. Alık Jatqambaıuly óz sózinde, sybaılastyqqa qarsy kúreste memleket pen halyqtyń ózara qarym-qatynasyndaǵy kedergilerdi joıýda ozyq tehnologııalar keń qoldanysqa ıe ekendigin alǵa tartty. «Sonymen qatar, ruhsat berý prosedýralary men ákimshilik kedergilerdi qysqartýdyń da mańyzy joǵary. Árıne, mundaı talaptar, eń aldymen, memlekettik qyzmet pen sot júıesi jáne quqyq qorǵaý organdarynyń zańnamalarynda aıqyn kórinýi tıis. Qazaqstan sońǵy kezderi osy saryndaǵy josparly jumystardy júıeli túrde júzege asyryp keledi», dedi baıandamashy.
Halyqaralyq deńgeıdegi sarapshylar men mamandar arasynda órbigen ashyq pikir almasý barysynda elimizdegi eleýli jobalar da áńgimege arqaý boldy. Atap aıtqanda, sheteldik delegasııa ókilderine «Adaldyq alańy» syndy qoǵamdyq qozǵalystyń tájirıbesi tanystyrylyp, uıym qyzmeti sheber uıymdastyrylatyndyǵy baıandaldy. Mundaı árekettiń barlyǵy da jemqorlyqty túp-tamyrymen joıý jolynda qoǵamdyq túsiniktiń qalyptasyp, onyń keń óris alyp jatýynyń aıqyn kórinisi retinde baǵalandy.
Nurlybek DOSYBAI, «Egemen Qazaqstan»
